കോന്നി : കോന്നി മെഡിക്കല് കോളേജ് റോഡ് വീതി കൂട്ടുന്നതുമായി ബന്ധപ്പെട്ട് സ്വകാര്യ വ്യക്തിയുടെ ഭൂമി കൂടുതല് കയ്യേറാന് ശ്രമിക്കുന്നതായി പരാതി. ഇത് സംബന്ധിച്ച് ഐരവണ് മുണ്ടക്കല് തോട്ടത്തില് വീട്ടില് റെനി മറിയം കോശി പൊതു മരാമത്ത് റോഡ് വിഭാഗത്തിന് പരാതി നല്കി. പന്ത്രണ്ട് മീറ്റര് വീതിയില് നിര്മ്മിക്കുന്ന റോഡിന് ഇരുവശവും ഉള്ള ആളുകളുടെ ഭൂമി തുല്യമായി എടുക്കേണ്ടതിന് പകരം എതിര് വശത്തുള്ള ഭൂമി എടുക്കാതെ റെനിയുടെ ഭൂമി കൂടുതല് എടുത്തതാണ് പരാതിക്കിടയാക്കിയത്.
കഴിഞ്ഞ ദിവസം പൊതു മരാമത്ത് വകുപ്പ് അധികൃതര് സ്ഥലത്തെത്തി ഭൂമി അളന്നതായും വീട്ടുകാര് പറയുന്നു. മുമ്പ് ഇവര് മെഡിക്കല് കോളേജ് റോഡിന് വിട്ടുനല്കിയ ഭൂമിക്ക് ആവശ്യമായ പണവും ബന്ധപ്പെട്ടവര് നല്കിയിട്ടില്ല എന്നും പരാതിയില് പറയുന്നു. മാത്രമല്ല റോഡിന് എതിര് വശത്തുള്ള വസ്തു ഉടമ മതില് ഇറക്കി കെട്ടിയിട്ടുണ്ട് എന്നും ഇതിനെതിരെ നടപടി എടുത്തിട്ടില്ലെന്നും ഇത് നിലനില്ക്കെ തന്നോട് മതില് പൊളിക്കാന് അധികൃതര് ആവശ്യപ്പെട്ടു എന്നുമാണ് റെനിയുടെ പരാതി. വിഷയത്തില് പി.ഡബ്ല്യു .ഡി പത്തനംതിട്ട എക്സിക്യുട്ടീവ് എഞ്ചിനീയര്ക്ക് അടക്കം റെനി പരാതി നല്കിയിട്ടുണ്ട്.
