പെരിങ്ങനാട് : ഇ.വി.റോഡ് നിർമാണവുമായി ബന്ധപ്പെട്ട് പെരിങ്ങനാട് വഞ്ചിമുക്കുമുതൽ-നെല്ലിമുകൾ വരെയുള്ള ഭാഗത്തെ പണി മന്ദഗതിയിൽ. മാസങ്ങൾക്കുമുമ്പ് തുടങ്ങിയ കലുങ്കുപണികൾ പോലും ഇപ്പോഴും പൂർത്തിയായിട്ടില്ല. ഓടകളുടെ നിർമാണംപോലും ഭാഗികമായി മാത്രമേ നടന്നിട്ടുള്ളൂ. ഓടകളുടെ പണി നടക്കുമ്പോൾ മുന്നറിയിപ്പ് ബോർഡുകളോ ബാരിക്കേഡുകളോ സ്ഥാപിക്കാറില്ലെന്ന് നാട്ടുകാർക്കിടയിൽ ആക്ഷേപമുണ്ട്.
കഴിഞ്ഞദിവസം പെരിങ്ങനാട് കാത്താടേത്ത് ജങ്ഷനു സമീപം നിർമാണം കഴിഞ്ഞ കലുങ്കിനോടു ചേർന്നുള്ള താഴ്ചയിൽ ഒരു പെട്ടി ഓട്ടോറിക്ഷ മറിഞ്ഞു. സംഭവത്തിൽ ആർക്കും പരിക്കില്ല. ബാരിക്കേഡ് ഇല്ലാത്തതായിരുന്നു ഈ അപകടത്തിന് കാരണമെന്ന് ആരോപണം ഉയരുന്നുണ്ട്.
