കൊല്ലം : കുളത്തൂപ്പുഴ ജുമാ മസ്ജിദ് ഇമാമിനെ കാറിടിച്ചു കൊലപ്പെടുത്താന് ശ്രമിച്ചെന്ന് പരാതി. സിസി ടിവി ദൃശ്യങ്ങള് പരിശോധിച്ച ശേഷം പോലീസ് സംഭവത്തില് വിശദമായ അന്വേഷണം തുടങ്ങി. കുളത്തൂപ്പുഴ ചോഴിയക്കോട് ജുമാ മസ്ജിദിലെ ഇമാം സഫീര് സെയിനിയെ കഴിഞ്ഞ ദിവസം രാത്രി പതിനൊന്നിനാണ് കാറിടിച്ച് കൊലപ്പെടുത്താന് ശ്രമിച്ചത്.
വിദേശത്ത് പോകുന്നതിനു മുന്പ് പ്രാര്ത്ഥിക്കണം എന്നാവശ്യപ്പെട്ട് യുവാവ് തന്നെ സമീപിക്കുകയായിരുന്നു എന്നാണ് ഇമാം പറയുന്നത്. യാത്രാമധ്യേ അപരിചിതരായ നാല് യുവാക്കള് കാറില് കയറി. സംശയം തോന്നി ഇമാം കാറില് നിന്നിറങ്ങി. ഇതിനു ശേഷമാണ് കാറിടിച്ചു വീഴ്ത്തിയത്. പന്തികേടു തോന്നിയതിനാലാണ് കാറില് നിന്നിറങ്ങിയതെന്ന് ഇമാം പിന്നീട് പ്രതികരിച്ചു.
‘ഞങ്ങള് പോകുന്ന വഴി എന്നെ കൊണ്ടുപോയ പയ്യന് ഒരു ഫോണ്കോള് വന്നു. അവന്റെ രണ്ടുമൂന്ന് കൂട്ടുകാര് അവിടെ നില്പ്പുണ്ട്. അവരെ കൂട്ടി വരാമെന്നു പറഞ്ഞു. ജംക്ഷന്റെ മറുവശത്ത് എത്തിയപ്പോള് അവന്റെ നാലു കൂട്ടുകാര് വന്നു. അവരുടെ രൂപങ്ങള് കണ്ടപ്പോള് എനിക്കെന്തോ പന്തികേടു തോന്നി. അവരുടെ കയ്യില് മൊബൈല് ഫോണല്ലാതെ മറ്റൊന്നും ഉണ്ടായിരുന്നില്ല. പക്ഷേ എന്റെ മനസ്സില് ഒരു ഭയപ്പാടു തോന്നി. ഞാന് വരുന്നില്ലെന്നു പറഞ്ഞ് കാറില്നിന്ന് ഇറങ്ങിയോടി.
ആദ്യം വന്ന പയ്യന് പ്രാര്ത്ഥനയ്ക്ക് വരാന് നിര്ബന്ധിച്ച് എന്റെ പിന്നാലെ വന്നു. പിന്നെ ഇവിടെയെത്തിയപ്പോള് ഈ തിട്ടയിലേക്ക് ചാടിക്കയറിയതു മാത്രമേ എനിക്ക് ഓര്മയുള്ളൂ’ ഇമാം വിവരിച്ചു. കാറില് നിന്നിറങ്ങി തിരികെ ഓടുന്ന ഇമാമിനെ പിന്നില് നിന്നു വന്ന് കാറിനിടിച്ച് വീഴ്ത്താനുള്ള ശ്രമം സിസിടിയില് പതിഞ്ഞിട്ടുണ്ട്. വീണിടത്തു നിന്ന് എഴുന്നേറ്റ് ഇമാം ഓടുന്നതും സിസിടിവി ദൃശ്യങ്ങളില് കാണാം. സംഭവത്തെ കുറിച്ച് പോലീസ് വിശദമായി അന്വേഷണം തുടങ്ങി.
