റാന്നി: കണ്ണമ്പള്ളി ഇടമുറി റോഡിൽ മെറ്റലും പാറപ്പൊടിയും കൂട്ടിയിട്ടിരിക്കുന്നെന്നു പരാതി. മുക്കട അത്തിക്കയം റോഡിന്റെ കണ്ണമ്പള്ളി വരെയുള്ള ഭാഗത്തെ വശം ഐറിഷ് ചെയ്യുന്നതിനായി കൊണ്ടുവന്ന മെറ്റലും പാറപ്പൊടിയുമാണ് യാത്രക്കാർക്ക് അപകടം ഉണ്ടാക്കുന്നവിധം ഇറക്കിയിട്ടിരിക്കുന്നത്. ശബരിമല നട തുറന്നിരിക്കുന്നതിനാൽ രാത്രി കാലങ്ങളിൽ ഉൾപ്പടെ നിരവധി വാഹനങ്ങൾ കടന്നു പോകുന്ന പ്രധാനപ്പെട്ട പാതയിലാണ് ഇത്തരത്തിൽ വളവിൽ അപകടക്കെണി ഉണ്ടാക്കിയിരിക്കുന്നത്.
ഇടമുറി ഭാഗത്തുനിന്നും വരുന്ന വാഹനങ്ങൾക്ക് കണ്ണമ്പള്ളി ഭാഗത്തുനിന്നും വരുന്ന വാഹനങ്ങളെ കാണാൻ കഴിയാത്ത നിലയിലാണ് റോഡിന്റെ ഘടനതന്നെ. ഇതിനോടൊപ്പം രണ്ടു വാഹനങ്ങളും ഒരു വശത്തേക്ക് വരുമ്പോൾ അപകടം ഉണ്ടാകാൻ സാദ്ധ്യത ഏറെയാണ്. അധികൃതർ ഇടപെട്ട് അപകടാവസ്ഥ ഒഴിവാക്കണമെന്നാണ് യാത്രക്കാരുടെ ആവശ്യം.