കോന്നി : കോന്നി മെഡിക്കല് കോളേജിലെ അത്യാഹിത വിഭാഗത്തിന് മുന്നില് ആംബുലന്സുകള് പാര്ക്ക് ചെയ്യുന്ന പോര്ച്ചിന്റെ ബീമുകളില് നിന്നും കോണ്ക്രീറ്റ് പാളികള് ഇളകി താഴെ വീഴുന്നു. കോണ്ക്രീറ്റ് റൂഫിലെ ഒരു വലിയ ഭാഗം ഇളകിമാറിയിട്ടുണ്ട്. കോണ്ക്രീറ്റിനുള്ളിലെ കമ്പികളും തെളിഞ്ഞ് കാണാനാകും. പാളി ഇളകി വീഴുമ്പോള് ഇതിന് കീഴില് വാഹനങ്ങളോ രോഗികളോ ഇല്ലാതെയിരുന്നതിനാല് വലിയ അപകടം ഒഴിവാകുകയായിരുന്നു. ഏതാനും വര്ഷങ്ങള്ക്ക് മുമ്പ് മാത്രം നിര്മ്മിച്ച കോന്നി മെഡിക്കല് കോളേജ് കെട്ടിടമാണ് തകര്ച്ചയെ നേരിടുന്നത്.
കോണ്ക്രീറ്റ് ഇളകി വീഴാന് തുടങ്ങിയിട്ട് കുറച്ച് നാളുകള് ആയെങ്കിലും ആരും ഇത് കാര്യമായി എടുത്തിട്ടില്ല. മെഡിക്കല് കോളേജ് അത്യാഹിത വിഭാഗത്തിന് മുന്നിലാണ് ഇത്തരത്തില് ഒരു അപകടം പതിയിരിക്കുന്നത് എന്നതാണ് ഏറ്റവും പ്രധാനം. പകലും രാത്രിയും പലപ്പോഴും രോഗികളും കൂട്ടിരിപ്പുകാരും ആംബുലന്സ് ഡ്രൈവര്മാരും ഉള്പ്പെടെയുള്ളവര് ഈ ഭാഗത്ത് നില്ക്കാറുണ്ട്. ഭാഗ്യം ഒന്നുകൊണ്ട് മാത്രമാണ് കോണ്ക്രീറ്റ് പാളികള് ആരുടേയും തലയില് വീഴാതെ രക്ഷപെടുന്നത്.
