ആലപ്പുഴ: കെ.എസ്.ആര്.ടി.സി ബസ് കണ്ടക്ടര് മൊബൈല് ഫോണ് ബസ് സ്റ്റേഷനില് വെച്ചു മറന്നു. കണ്ടക്ടര്ക്ക് ഫോണ് തിരികെ നല്കുന്നതിനായി ബസ് റോഡരികില് 15 മിനിറ്റോളം നിര്ത്തിയിട്ടു. തിരുവനന്തപുരത്തു നിന്നു പാലക്കാട്ടേക്ക് പോയ സൂപ്പര് ഫാസ്റ്റ് ബസിലെ കണ്ടക്ടറാണ് ഹരിപ്പാട് ബസ് സ്റ്റേഷനില് റിപ്പോര്ട്ട് ചെയ്യാന് വേണ്ടി ഇറങ്ങിയപ്പോള് ഓഫീസില് ഫോണ് വെച്ച് മറന്നത്. ദേശീയപാതയില് താമല്ലാക്കല് ജംങ്ഷന് കഴിഞ്ഞപ്പോഴാണ് മൊബൈല് ഫോണ് കൈവശമില്ലെന്ന് കണ്ടക്ടര് അറിഞ്ഞത്.
തുടര്ന്ന് ഹരിപ്പാട് കെ.എസ്.ആര്.ടി.സി സ്റ്റേഷനില് വിവരമറിയിച്ചു. പിന്നാലെ പ്രത്യേക വാഹനത്തില് ഫോണ് എത്തിക്കുകയായിരുന്നു. എന്നാല് ഇക്കാര്യത്തില് അസ്വാഭികത ഒന്നുമില്ലെന്ന് അധികൃതര് പറഞ്ഞു. ദീര്ഘദൂര ബസ്സുകളില് കണ്ടക്ടറുടെ മൊബൈല്ഫോണ് ഒഴിച്ചുകൂടാന് പറ്റാത്തതാണെന്നും അതുകൊണ്ടാണ് ഫോണ് എത്തിക്കുന്നതുവരെ ബസ്സ് നിര്ത്തിയിട്ടതെന്നും കെ.എസ്.ആര്.ടി.സി അധികൃതര് വ്യക്തമാക്കി.