തിരുവനന്തപുരം : തലസ്ഥാന നഗരിയില്‍ പോലീസിന് നേരെ വീണ്ടും ഗുണ്ടാ ആക്രമണം. പതിനൊന്ന് പേർക്കെതിരെ വെള്ളറട പോലീസ് കേസെടുത്തു. വെള്ളറട സ്റ്റേഷനിലെ ഗ്രേഡ് എസ്ഐ സുരേഷ്, ഡ്രൈവർ സിപിഒ അരുൺ എന്നിവർക്ക് നേരെയാണ് ആക്രമണമുണ്ടായത്. കാരക്കോണത്ത് നടന്ന ഓണാഘോഷത്തിനിടെ രണ്ട് സംഘങ്ങൾ തമ്മിലുളള ഏറ്റുമുട്ടല്‍ അറിഞ്ഞതോടെ വെള്ളറട പോലീസ് സ്ഥലത്ത് എത്തുകയായിരുന്നു.
അക്രമികൾ പോലീസുകാരുടെ യൂണിഫോം വലിച്ചു കീറി. അക്രമത്തിന് ഇരയായ പോലീസുകാർ ആശുപത്രിയിൽ ചികിത്സ തേടി. അക്രമസംഘത്തിൽ ഉൾപ്പെട്ട രണ്ട് പേരെ പോലീസ് ജീപ്പിലേക്ക് കേറ്റുന്നതിനിടെ ആക്രമണം നടക്കുകയായിരുന്നു. ഔദ്യോഗിക കൃത്യനിർവഹണം തടസ്സപ്പെടുത്തിയതിനും കൈയ്യേറ്റം ചെയ്തതിനും പതിനൊന്ന് പേരെ പ്രതിക്കെതിരെ പോലീസ് കേസെടുത്തിട്ടുണ്ട്.
