റാന്നി : ബസ് കാത്തിരിപ്പു കേന്ദ്രമില്ലാത്തതിനാല് പ്ലാച്ചേരിയിലെത്തുന്ന യാത്രക്കാര് വലയുന്നു. മഴയും വെയിലും ഏല്ക്കാതിരിക്കാന് യാത്രക്കാര് കടത്തിണ്ണകളെയാണ് ആശ്രയമാക്കുന്നത്. പത്തനംതിട്ട – കോട്ടയം ജില്ലകളുടെ അതിര്ത്തിയിലെ പ്രധാന ജംങ്ഷനാണ് പ്ലാച്ചേരി. എരുമേലി, റാന്നി, മണിമല ഭാഗങ്ങളിലേക്ക് പോകാന് എത്തുന്ന യാത്രക്കാര്ക്ക് ബസ് കാത്തുനില്ക്കാന് സ്ഥലമില്ല. നിലവില് റോഡ് ഉന്നത നിലവാരത്തില് നിര്മ്മിച്ചപ്പോള് ബസ് കാത്തിരിപ്പു കേന്ദ്രവും ബസ് ബേയും നിര്മ്മിക്കുമെന്ന് അധികൃതര് പറഞ്ഞിരുന്നു.
ഇതിന് ആവശ്യമായ സ്ഥലവും ഇവിടുണ്ട്. എന്നാല് കരാര് കമ്പനി ഇതു രണ്ടും നിര്മ്മിക്കാന് ഇതു വരെ തയ്യാറായിട്ടില്ല. പൊന്കുന്നം – പ്ലാച്ചേരി റീച്ചില് ഉള്പ്പെട്ട ഈ ഭാഗം ടാറിംങ് പൂര്ത്തിയാക്കി കമ്പനി മടങ്ങിയിട്ടു നാളുകളായി. നാട്ടുകാര് കെ.എസ്.ടി.പി അടക്കം പരാതി നല്കിയിട്ടും യാതൊരു പ്രയോജനവും ഉണ്ടായിട്ടില്ല. ഇതുമൂലം ഇവിടെ എത്തുന്ന യാത്രക്കാര്ക്ക് കടത്തിണ്ണകളാണ് അഭയകേന്ദ്രം.
