മാഹി : മാഹിയില്‍ കൊവിഡ് വൈറസ് ബാധ സ്ഥിരീകരിച്ചു. പുതുച്ചേരി ആരോഗ്യ മന്ത്രിയാണ് ഇക്കാര്യം അറിയിച്ചത്. ആഴ്ചകള്‍ക്ക് മുന്‍പ് യുഎഇയില്‍ നിന്ന് മാഹിയിലെത്തിയ 68 വയസ്സുള്ള സ്ത്രീക്കാണ് കൊവിഡ് വൈറസ് ബാധ സ്ഥിരീകരിച്ചത്. ഇവരുടെ ആരോഗ്യനില തൃപ്തികരമാണെന്നാണ് റിപ്പോര്‍ട്ട്. മാഹി സര്‍ക്കാര്‍ ആശുപത്രിയിലാണ് ഇവരിപ്പോള്‍. ഇവരുമായി അടുത്തിടപഴകിയ വീട്ടുകാരും നിരീക്ഷണത്തിലാണ്.
അതേസമയം, കൊവിഡ് വൈറസ് ബാധ ലക്ഷണങ്ങളുള്ള മൂന്ന് പേര്‍ കേന്ദ്ര ഭരണ പ്രദേശത്തെ സര്‍ക്കാര്‍, സ്വകാര്യ ആശുപത്രികളില്‍ നിരീക്ഷണത്തിലാണ്. കൊറോണ വൈറസ് പടരാതിരിക്കാനുള്ള മുന്‍കരുതല്‍ നടപടികളുടെ ഭാഗമായി തുടര്‍ ഉത്തരവുകള്‍ വരുന്നതുവരെ പുതുച്ചേരി സര്‍ക്കാര്‍ കേന്ദ്രഭരണ പ്രദേശത്തെ എല്ലാ പ്രീ കെജി, പ്രൈമറി സ്കൂളുകള്‍ക്കും അവധി പ്രഖ്യാപിച്ചു. ഇന്ത്യയില്‍ കൊവിഡ് ബാധ സ്ഥിരീകരിക്കുന്ന ആദ്യ കേന്ദ്ര ഭരണ പ്രദേശം കൂടിയാണ് മാഹി.
