തൃശൂര്‍: ചേലക്കരയില്‍ കത്തിക്കുത്തേറ്റ് ഒരാള്‍ മരിച്ചു. കോട്ടയം സ്വദേശി ജോര്‍ജാണ് (60) കുത്തേറ്റ് മരിച്ചത്. കുടുംബ വഴക്ക് കത്തിക്കുത്തില്‍ കലാശിക്കുകയായിരുന്നു. സംഘര്‍ഷത്തില്‍ മറ്റ് രണ്ട് പേര്‍ക്ക് പരിക്കേറ്റിട്ടുണ്ട്. ഇവരെ തൃശൂര്‍ മെഡി. കോളേജ് ആശുപത്രിയില്‍ പ്രവേശിപ്പിച്ചിരിക്കുകയാണ്. തമിഴ്‌നാട് സ്വദേശി പളനിസ്വാമി, മകന്‍ സുധാകരന്‍ എന്നിവര്‍ക്കാണ് പരിക്കേറ്റത്. ചേലക്കര പരക്കാടാണ് സംഭവം നടന്നത്.
ചേലക്കര പരക്കാട് മൂന്ന് പേരും താമസിച്ച് വരികയായിരുന്നു. ജോര്‍ജ് കൃഷിത്തോട്ടത്തിലും മറ്റുള്ളവര്‍ ക്വാറിയിലുമാണ് ജോലി ചെയ്യുന്നത്. ജോര്‍ജിന്റെ ബന്ധുവിനെയാണ് സുധാകരന്‍ വിവാഹം കഴിച്ചിട്ടുള്ളത്. ഇതുമായി ബന്ധപ്പെട്ട് ഇവര്‍ തമ്മില്‍ തര്‍ക്കമുണ്ടായിരുന്നു. ഇന്നലെയും ഇവര്‍ തമ്മില്‍ വഴക്കുണ്ടായിരുന്നു. ജോര്‍ജ് കത്തിയുമായി ഇവര്‍ വാടകയ്ക്ക് താമസിക്കുന്ന സ്ഥലത്ത് എത്തിയതോടെയാണ് സംഘര്‍ഷമുണ്ടായത്.
