ന്യൂഡല്ഹി : കോണ്ഗ്രസിന്റെ പുതിയ പ്രസിഡന്റിനെ ഇന്ന് ഔപചാരികമായി പ്രഖ്യാപിക്കും. 68 പോളിങ് ബൂത്തുകളില്നിന്ന് ഡല്ഹിയിലെ എ.ഐ.സി.സി ആസ്ഥാനത്തെത്തിച്ച ബാലറ്റ് പെട്ടികളിലുള്ള 9500ഓളം വോട്ടുകള് രാവിലെ 10ന് എണ്ണിത്തുടങ്ങും. അത്ഭുതങ്ങള്ക്ക് സാധ്യതയില്ലാത്ത തെരഞ്ഞെടുപ്പില് ബഹുഭൂരിപക്ഷത്തിന്റെ പിന്തുണയുള്ള മല്ലികാര്ജുന് ഖാര്ഗെക്കും മെച്ചപ്പെട്ട മത്സരം കാഴ്ചവെച്ച ശശി തരൂരിനും ലഭിക്കുന്ന വോട്ടുകളുടെ എണ്ണം അറിയാനാണ് പൊതുവായ ആകാംക്ഷ.
ശശി തരൂര് പിടിക്കുന്ന വോട്ടുകളുടെ എണ്ണം കോണ്ഗ്രസിലെ തിരുത്തലുകള്ക്കുവേണ്ടിയുള്ള ശബ്ദമായാണ് വിലയിരുത്തപ്പെടുക. മല്ലികാര്ജുന് ഖാര്ഗെക്കു കിട്ടുന്ന വോട്ട് നെഹ്റു കുടുംബത്തോട് വിവിധ സംസ്ഥാനങ്ങളിലെ നേതൃനിരക്കുള്ള വിധേയത്വത്തിന്റെ പ്രകടനമാവും. 24 വര്ഷത്തിനുശേഷം നെഹ്റു കുടുംബത്തിനു പുറത്തേക്ക് പ്രസിഡന്റ് സ്ഥാനം കൈമാറുന്ന നിര്ണായക സന്ദര്ഭത്തിലാണ് കോണ്ഗ്രസ്. വോട്ടെണ്ണലിന് ക്രമീകരണങ്ങള് പൂര്ത്തിയായെന്ന് തെരഞ്ഞെടുപ്പ് അതോറിറ്റി ചെയര്മാന് മധുസൂദന് മിസ്ത്രി അറിയിച്ചു.
