കാട്ടാക്കട : കോട്ടൂര് അഗസ്ത്യവന മേഖലയില് കാട്ടാനയെ ചരിഞ്ഞ നിലയില് കണ്ടെത്തി. കുറ്റിച്ചല് പഞ്ചായത്തിലെ പട്ടാണിപ്പാറ ആദിവാസി സെറ്റില്മെന്റില് ഇന്നലെയാണ് ആദിവാസികള് കാട്ടാനയെ ചരിഞ്ഞ നിലയില് കണ്ടെത്തിയത്. ചരിഞ്ഞ ആനയ്ക്ക് അടുത്ത് കുട്ടിയാനയും നില്ക്കുന്നതായി ആദിവാസികള് നല്കിയ വിവരത്തിന്റെ അടിസ്ഥാനത്തില് രാത്രി ഏഴോടെ വൈല്ഡ് ലൈഫ് വാര്ഡന് സുരേഷ് ബാബു,പേപ്പാറ അസിസ്റ്റന്റ് വാര്ഡന് സലിംജോസ്,അഗസ്ത്യവനം ഡെപ്യൂട്ടി വാര്ഡന് അനീഷ് കുമാര് എന്നിവരുടെ നേതൃത്വത്തിലുള്ള വനപാലക സംഘം വനത്തിലെത്തി രണ്ടര വയസോളം പ്രായമുള്ള കുട്ടിയാനയെ പിടികൂടി. പ്രത്യേക വാഹനത്തില് രാത്രി ഒന്പതോടെ വനംവകുപ്പ് ഉദ്യോഗസ്ഥര് കാട്ടാനക്കുട്ടിയെ കോട്ടൂര് കാപ്പുകാട്ടെ ആന പുനരധിവാസ കേന്ദ്രത്തില് എത്തിച്ചു. ചരിഞ്ഞ ആനയുടെ പോസ്റ്റ്മോര്ട്ടം നടത്തിയശേഷം ഇന്ന് ആദിവാസി ഊരില് സംസ്കരിക്കുമെന്ന് ഫോറസ്റ്റ് ഉദ്യോഗസ്ഥര് അറിയിച്ചു.
