മലപ്പുറം : മഞ്ചേരി സബ് ഇന്സ്പെക്ടറും പോലീസുകാരും തന്നോടും കുടുംബത്തോടും അപമര്യാദയായി പെരുമാറിയതായി കൂമംകുളം നെട്ടാടിയില് അമൃത എന്. ജോസ് പത്രസമ്മേളനത്തില് ആരോപിച്ചു. കഴിഞ്ഞ വെള്ളിയാഴ്ച രാത്രി പത്തോടെ മഞ്ചേരി-നിലമ്പൂര് റൂട്ടിലാണ് സംഭവം. ഒരു യാത്രയ്ക്കിടെ കടയില് ചായകുടിക്കാന് നിര്ത്തിയപ്പോള് പോലീസുകാര് അതിക്രമിച്ചുകയറി കാര് പരിശോധിച്ചു. കാരണം ചോദിച്ചപ്പോള് അസഭ്യംപറഞ്ഞു. ഇത് മൊബൈല്ക്യാമറയില് പകര്ത്താന് ശ്രമിച്ച അനുജന്റെ മൊബൈല്ഫോണ് ബലംപ്രയോഗിച്ച് വാങ്ങി.
അല്പസമയം കഴിഞ്ഞപ്പോള് ഇന്സ്പെക്ടറുടെ നേതൃത്വത്തില് മറ്റൊരു സംഘം എത്തി. തന്നെയും അനുജന്മാരെയും വലിച്ചിഴച്ച് പോലീസ് സ്റ്റേഷനിലേക്ക് കൊണ്ടുപോയി. തന്റെ പത്തുവയസ്സുള്ള മകനെ റോഡില് നിര്ത്തിയാണ് തങ്ങളെ കൊണ്ടുപോയതെന്ന് അമൃത ആരോപിച്ചു. പുലര്ച്ചെ മൂന്നുമണിവരെ മകനെ കാണാന്പോലും അനുവദിച്ചില്ലെന്നും പോലീസുകാര്ക്കെതിരേ നടപടിവേണമെന്നും അവര് ആവശ്യപ്പെട്ടു. മനുഷ്യാവകാശ കമ്മിഷന്, വനിതാ കമ്മിഷന്, ബാലാവകാശ കമ്മിഷന് എന്നിവര്ക്ക് പരാതി നല്കിയതായും അമൃതയും സഹോദരങ്ങളും പത്രസമ്മേളനത്തില് പറഞ്ഞു.
