ന്യൂഡല്ഹി : സുപ്രധാന കോണ്ഗ്രസ് പ്രവര്ത്തക സമിതി യോഗം ഇന്ന് രാജ്യതലസ്ഥാനത്ത് ചേരും. ഇടക്കാല അധ്യക്ഷ സോണിയ ഗാന്ധിയുടെ അധ്യക്ഷതയില് രാവിലെ പത്തിന് എ.ഐ.സി.സി ആസ്ഥാനത്താണ് യോഗം. പാര്ട്ടിക്ക് മുഴുവന് സമയ അധ്യക്ഷനെ വേണമെന്നതടക്കമുള്ള ആവശ്യങ്ങള് ഉന്നയിക്കാന് അടിയന്തരമായി പ്രവര്ത്തക സമിതി വിളിക്കണമെന്ന ഗ്രൂപ്പ് 23 നേതാക്കളുടെ സമ്മര്ദ്ദത്തെ തുടര്ന്നാണ് യോഗം വിളിച്ചുചേര്ത്തിരിക്കുന്നത്. സംഘടന തിരഞ്ഞെടുപ്പ് തീയതി യോഗത്തില് തീരുമാനിക്കുമെന്നാണ് കരുതുന്നത്.
കോണ്ഗ്രസ് പ്രവര്ത്തക സമിതി യോഗത്തില് പൂര്ണ്ണസമയ പ്രസിഡന്റ് വേണം എന്ന ആവശ്യം ഉയര്ത്താനാണ് വിമതഗ്രൂപ്പ് ഒരുങ്ങുന്നത്. സംഘടന തെരഞ്ഞെടുപ്പിലൂടെ ഇത് തീരുമാനിക്കാം എന്ന് എ.ഐ.സി.സി യോഗത്തില് നിര്ദേശിക്കും. അടുത്ത മാസം അംഗത്വം പുതുക്കല് തുടങ്ങി അടുത്ത വര്ഷം ആഗസ്തോടെ പ്രവര്ത്തകസമിതി തെരഞ്ഞെടുപ്പ് നടക്കുന്ന രീതിയില് സമ്മേളനങ്ങള് നിശ്ചയിക്കാം എന്ന നിര്ദ്ദേശമാണ് നേതൃത്വത്തിനുള്ളത്.
