ഹൈദരാബാദ്: സിനിമയില് സ്വിമ്മിങ് പൂളില് മൂത്രമൊഴിച്ചതിന് അല്ലു അര്ജുനെതിരേ പരാതിയുമായി തെലങ്കാനയിലെ കോണ്ഗ്രസ് നേതാവ് തീന്മര് മല്ലണ്ണ. പുഷ്പ 2 ല് അല്ലു അര്ജുന്റെ കഥാപാത്രം സ്വിമ്മിങ് പൂളില് മൂത്രമൊഴിക്കുന്ന രംഗമുണ്ട്. ഈ രംഗത്തിനെതിരെയാണ് പരാതി. നിയമപാലകരുടെ അഭിമാനത്തെ തന്നെ ചോദ്യം ചെയ്യുന്ന തരത്തിലുള്ള രംഗമാണെന്നാണ് കോണ്ഗ്രസ് നേതാവിന്റെ പരാതിയിലുള്ളത്. ഒട്ടും മര്യാദയില്ലാത്ത രംഗമാണ്. നിയമപാലകരുടെ അഭിമാനത്തെ തന്നെ ചോദ്യം ചെയ്യുന്ന തരത്തിലുള്ള രംഗം. ഇത് എങ്ങനെ അംഗീകരിക്കാനാകും എന്നാണ് കോണ്ഗ്രസ് നേതാവ് പരാതിയില് പറഞ്ഞിരിക്കുന്നത്. അല്ലു അര്ജുന് പുറമേ ചിത്രത്തിന്റെ സംവിധായകന് സുകുമാറിനെതിരേയും പരാതി നല്കിയിട്ടുണ്ട്. അതേസമയം, പുഷ്പ 2 ചിത്രത്തിന്റെ പ്രദര്ശനത്തിനിടെ ഉണ്ടായ തിക്കിലും തിരക്കിലും പെട്ട് സ്ത്രീ മരിച്ച സംഭവത്തില് അല്ലു അര്ജുന് ചോദ്യം ചെയ്യലിന് ഹാജരായി. രാവിലെ പതിനൊന്ന് മണിയോടെ ഹൈദരാബാദിലെ ചിക്കഡ്പള്ളി പോലീസ് സ്റ്റേഷനിലാണ് താരം ചോദ്യം ചെയ്യലിനെത്തിയത്. ചോദ്യങ്ങള്ക്കൊന്നും അല്ലു അര്ജുന് കൃത്യമായ മറുപടി നല്കിയില്ലെന്നാണ് പോലീസ് വൃത്തങ്ങള് പറയുന്നത്.
ഡിസംബര് നാലിനായിരുന്നു സംഭവം. പുഷ്പ 2 റിലീസിനിടെ ഹൈദരാബാദിലെ സന്ധ്യ തീയേറ്ററില് അല്ലു അര്ജുന് സന്ദര്ശിച്ചിരുന്നു. താരം തീയേറ്ററില് എത്തിയപ്പോഴുണ്ടായ തിക്കിലും തിരക്കിലും പെട്ട് സ്ത്രീ മരിക്കുകയും അവരുടെ എട്ടുവയസുള്ള കുട്ടിക്ക് ഗുരുതരമായ പരിക്കേല്ക്കുകയും ചെയ്തിരുന്നു. തുടര്ന്ന് അല്ലു അര്ജുനെ പോലീസ് അറസ്റ്റ് ചെയ്യുകയായിരുന്നു. അന്വേഷണ സംഘത്തോട് പൂര്ണ്ണമായും സഹകരിക്കാമെന്നതിന്റെ അടിസ്ഥാനത്തില് പിന്നീട് താരത്തെ ജാമ്യത്തില് വിട്ടയക്കുകയായിരുന്നു. അല്ലു അര്ജുന്റെ തീയേറ്റര് സന്ദര്ശനത്തിന് പോലീസ് അനുമതി നിഷേധിച്ചിരുന്നുവെന്ന് തെലങ്കാന മുഖ്യമന്ത്രി രേവന്ദ് റെഡ്ഡി നേരത്തെ പറഞ്ഞിരുന്നു.
