ന്യൂഡല്ഹി : ഇസ്രായേല് ചാര സോഫ്റ്റ്വെയറായ ’പെഗസസ് ‘ മുഖേന രാജ്യത്ത് ചാരവൃത്തി നടത്തിയിട്ടുണ്ടോ എന്ന് പ്രധാനമന്ത്രി പാര്ലമെന്റില് പ്രസ്താവന നടത്തണമെന്നാവശ്യപ്പെട്ട് കോണ്ഗ്രസ് നേതാവും മുന് കേന്ദ്ര ആഭ്യന്തര മന്ത്രിയുമായ ചിദംബരം. സംഭവത്തില് സംയുക്ത പാര്ലമെന്ററി സമിതി (ജെ.പി.സി) അന്വേഷണത്തിന് ഉത്തരവിടുകയോ സുപ്രീംകോടതി സിറ്റിങ് ജഡ്ജിയെ കൊണ്ട് അന്വേഷിപ്പിക്കുകയോ വേണമെന്നും ചിദംബരം നിര്ദേശിച്ചു.
ഈ ചാരവൃത്തി വഴി 2019 ലെ പൊതുതെരഞ്ഞെടുപ്പ് ഫലം അട്ടിമറിച്ചോ എന്ന് ഉറപ്പിച്ചു പറയാന് തനിക്ക് കഴിയില്ലെന്ന് പ്രമുഖ വാര്ത്താ ഏജന്സിക്ക് നല്കിയ അഭിമുഖത്തില് ചിദംബരം ചൂണ്ടിക്കാട്ടി. എന്നാല് ഇത് ബി.ജെ.പിക്ക് വിജയം നേടാന് സഹായകമായിട്ടുണ്ടാകാം. ജെ.പി.സിയാണ്, ഐ.ടിക്കുള്ള പാര്ലമെന്ററി സ്ഥിരസമിതിയുടെ അന്വേഷണത്തേക്കാള് ഫലപ്രദമാകുക.
അതെ സമയം ജെ.പി.സിക്കാണ് പാര്ലമെന്ററി അധികാരങ്ങള് കൂടുതലുള്ളതെന്നും വിഷയം ഐ.ടിക്കുള്ള പാര്ലമെന്ററി സമിതിയുടെ പരിഗണനയിലാണെന്നും ജെ.പി.സി ആവശ്യമില്ലെന്നുമുള്ള ശശി തരൂരിന്റെ നിലപാടിനോട് ചിദംബരം എതിര്പ്പ് രേഖപ്പെടുത്തി.
ബി.ജെ.പിക്ക് ഭൂരിപക്ഷമുള്ള പ്രസ്തുത പാര്ലമെന്ററി സമിതി സമഗ്രമായ അന്വേഷണത്തിന് അനുവദിക്കുമോ എന്ന കാര്യത്തില് തനിക്ക് സംശയമുണ്ടെന്നും എന്നാല് പാര്ലമെന്ററി സമിതിക്ക് അന്വേഷിക്കാന് അധികാരമില്ലെന്ന് താന് പറയുന്നില്ലെന്നും നടത്തുകയാണെങ്കില് അതിനെ സ്വാഗതം ചെയ്യുന്നുവെന്നും ചിദംബരം കൂട്ടിച്ചേര്ത്തു.
