തിരുവനന്തപുരം : തിരുവനന്തപുരത്ത് കെട്ടിട നിർമാണ തൊഴിലാളിയായ യുവാവിനെ കിണറ്റിൽ മരിച്ച നിലയിൽ കണ്ടെത്തി. തിരുവനന്തപുരം വാമനപുരം മേലാറ്റുമൂഴി തേക്കിൻകാട് വീട്ടിൽ പരേതനായ കൃഷ്ണൻകുട്ടിയുടെയും ഓമനയുടെയും മകൻ അരുണി(30)നെയാണ് മേലാറ്റുമൂഴിക്കു സമീപമുള്ള ചായക്കടയോട് ചേർന്നുള്ള കിണറ്റിൽ മരിച്ച നിലയിൽ കണ്ടെത്തിയത്.
തിങ്കളാഴ്ച രാവിലെ സുഹൃത്തിന്റെ വീട്ടിൽ പോകുന്നുവെന്ന് പറഞ്ഞാണ് അരുൺ വീട്ടിൽ നിന്ന് പോയത് എന്ന് ബന്ധുക്കൾ പറയുന്നു. പിന്നീട് ഇയാളെ ബന്ധുക്കൾ ഫോണിൽ ബന്ധപ്പെടാൻ ശ്രമിച്ചെങ്കിലും സാധിച്ചില്ല. തുടർന്ന് നടത്തിയ അന്വേഷണത്തിൽ ചൊവ്വാഴ്ച ഉച്ചയോടെ കിണറ്റില് നിന്നും അരുണിന്റെ മൃതദേഹം കണ്ടെത്തുകയായിരുന്നു. സംഭവത്തിൽ ദുരൂഹതയുണ്ടെന്നും കാണിച്ച് ബന്ധുക്കൾ വെഞ്ഞാറമൂട് പോലീസിൽ പരാതി നൽകി. പരാതിയുടെ അടിസ്ഥാനത്തിൽ പോലീസ് കേസെടുത്തു. സമീപത്തെ സിസിടിവി ഉൾപ്പെടെ പരിശോധിച്ചു അന്വേഷണം നടക്കുകയാണെന്ന് പോലീസ് പറഞ്ഞു.
