സിംഗപ്പൂര്: കോടതിയുടെ ഉത്തരവുകള് പാലിക്കാന് വൈമുഖ്യം കാണിച്ചുവെന്ന കേസില് എഡ്യുടെക് കമ്പനിയായ ബൈജൂസ് സ്ഥാപക ഉടമ ബൈജൂ രവീന്ദ്രന് ആറ് മാസം തടവുശിക്ഷയും 70,500 ഡോളര് (66 ലക്ഷം രൂപയോളം) പിഴയും ചുമത്തി സിംഗപ്പൂര് കോടതി. ബൈജുവിന്റെ ആസ്തിയുമായി ബന്ധപ്പെട്ട് 2024 ഏപ്രില് മുതല് കോടതി നല്കിയ ഉത്തരവുകള് ലംഘിച്ചുവെന്ന് കാണിച്ചാണ് ശിക്ഷ. ഉദ്യോഗസ്ഥര്ക്ക് മുമ്പാകെ സ്വമേധയാ ഹാജരാകണമെന്നും 90,000 സിംഗപ്പൂര് ഡോളര് (70,500 യു.എസ് ഡോളര്) കെട്ടിവെയ്ക്കണമെന്നും കോടതി ഉത്തരവിട്ടു. Beeaar Investco Pte കമ്പനിയുടെ ഓഹരി പങ്കാളിത്തവുമായി ബന്ധപ്പെട്ട രേഖകള് സമര്പ്പിക്കാനും കോടതി നിര്ദ്ദേശിച്ചു.
യു.എസ് ഉള്പ്പെടെ വിവിധ രാജ്യങ്ങളില് നിരവധി കേസുകളാണ് ബൈജു ഇപ്പോള് നേരിട്ടുകൊണ്ടിരിക്കുന്നത്. ഖത്തര് ഹോള്ഡിംഗ് നല്കിയ ഹര്ജിയിലാണ് സിംഗപ്പൂര് കോടതിയുടെ നിര്ണായക ഉത്തരവ്. ബൈജു രവീന്ദ്രന് എവിടെയാണെന്ന കാര്യത്തില് നിലവില് വ്യക്തതയില്ല. കര്ശന നിയമങ്ങളുള്ള രാജ്യമാണ് സിംഗപ്പൂര്. അധികൃതര്ക്ക് മുന്നില് കീഴടങ്ങാതെ ബൈജുവിന് മറ്റു മാര്ഗമുണ്ടാവില്ല.
