കടയ്ക്കൽ : കൊല്ലം കടയ്ക്കലിൽ പ്രവാസി ദമ്പതികളെ വീടിനുള്ളിൽ മരിച്ച നിലയിൽ കണ്ടെത്തി. അഞ്ചുമുക്ക് സ്വദേശിയായ സുഗതൻ, ഭാര്യ ലത എന്നിവരെയാണ് ഇന്ന് രാവിലെ മരിച്ച നിലയിൽ കണ്ടെത്തിയത്. ഏറെ നാളായി വിദേശത്ത് സ്ഥിരതാമസമാക്കിയിരുന്ന ഈ കുടുംബം ഏതാനും ദിവസങ്ങൾക്ക് മുമ്പാണ് നാട്ടിലെത്തിയത്. ഇവരുടെ മകൻ കഴിഞ്ഞ ദിവസം വിദേശത്തേക്ക് മടങ്ങിയിരുന്നു. സുഗതനും ലതയും ഇന്ന് വിദേശത്തേക്ക് തിരികെ പോകാനിരിക്കെയാണ് മരിച്ച നിലയിൽ കണ്ടെത്തിയത്.
ഇന്ന് രാവിലെ വീട്ടിലേക്ക് ഭക്ഷണവുമായെത്തിയ ബന്ധുവാണ് വിവരം ആദ്യം അറിഞ്ഞത്. വീട് തുറക്കാത്തതിനെ തുടർന്ന് വാതിൽ തള്ളിത്തുറന്ന് അകത്തു കയറി പരിശോധിച്ചപ്പോഴാണ് കിടപ്പുമുറിയിൽ ഇരുവരുടെയും മൃതദേഹങ്ങൾ കണ്ടെത്തിയത്. സംഭവമറിഞ്ഞ ഉടൻ കടയ്ക്കൽ പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. മൃതദേഹങ്ങൾ പോസ്റ്റ്മോർട്ടത്തിനായി മാറ്റിയിട്ടുണ്ട്. മരണകാരണം സംബന്ധിച്ച് വ്യക്തത വരുത്താൻ പോലീസ് അന്വേഷണം ആരംഭിച്ചു.
