കോയമ്പത്തൂര്: കോയമ്പത്തൂര് സ്ഫോടന കേസുമായി ബന്ധപ്പെട്ട് പാലക്കാടും എന്ഐഎ റെയ്ഡ്. കൊല്ലങ്കോടിനടുത്ത് മുതലമട ചപ്പക്കാടാണ് എന്ഐഎ സംഘം ഇന്ന് പുലര്ച്ചയെത്തി പരിശോധന നടത്തിയത്. മുതലമടയില് താമസിക്കുന്ന കോയമ്പത്തൂര് സ്വദേശി ഷെയ്ക്ക് മുസ്തഫയുടെ വീട്ടിലെത്തിയ അന്വേഷണ സംഘം ഡിജിറ്റല് ഉപകരണങ്ങളും ഡോക്യുമെന്റുകളും പിടിച്ചെടുത്തു. ഐഎസ് ബന്ധത്തെ തുടര്ന്ന് അറസ്റ്റിലായ റിയാസ് അബൂബക്കറിന്റെ ബന്ധുവാണ് മുസ്തഫ. ഇയാള്ക്ക് ഏതെങ്കിലും രീതിയില് സ്ഫോടനവുമായി ബന്ധമുണ്ടോയെന്നാണ് പരിശോധിക്കുന്നത്. പാലക്കാട്ടെ റെയ്ഡ് മൂന്ന് മണിക്കൂറോളം നീണ്ടുനിന്നു.
കോയമ്പത്തൂര് കാര് ബോംബ് സ്ഫോടനവുമായി ബന്ധപ്പെട്ട് തമിഴ്നാട്ടില് ഇന്ന് വ്യാപകമായി എന്ഐഎ റെയ്ഡ് നടത്തിയിരുന്നു. ഇതിന്റെ ഭാഗമായാണ് പാലക്കാട്ടും പരിശോധനയുണ്ടായത്. കോയമ്പത്തൂരടക്കം 45 സ്ഥലങ്ങളിലാണ് അതിരാവിലെ മുതല് അന്വേഷണ സംഘം റെയ്ഡ് നടത്തിയത്. അന്വേഷണം ഏറ്റെടുത്ത ശേഷം എന്ഐഎ നടത്തുന്ന ഏറ്റവും വലിയ പരിശോധനയാണിത്.
