ന്യൂഡല്ഹി : ഇന്ത്യയില് കോവിഡ് രണ്ടാം തരംഗം മെയ് മാസം പകുതിയോടെ മൂര്ധന്യത്തിലെത്തുമെന്ന് ഐഐടി ശാസ്ത്രജ്ഞര്. മെയ് 11-15 വരെയുള്ള കാലയളവില് സജീവ കോവിഡ് കേസുകളുടെ എണ്ണം 33-35 ലക്ഷത്തിലെത്തിയേക്കാമെന്നും മെയ് അവസാനത്തോടെ രോഗവ്യാപനം കുത്തനെ കുറയുമെന്നും ഐഐടി വിദഗ്ദ്ധര് തയ്യാറാക്കിയ കണക്കുകള് സൂചിപ്പിക്കുന്നു.
രോഗവ്യാപനം കുറയുന്നതിന് മുമ്പ് മെയ് പകുതിയോടെ രാജ്യത്തെ സജീവ കോവിഡ് കേസുകള് 10 ലക്ഷത്തോളം വര്ദ്ധിക്കുമെന്നാണ് കാണ്പുര്, ഹൈദ്രാബാദ് ഐഐടികളിലെ വിദഗ്ദ്ധ സംഘത്തിന്റെ വിലയിരുത്തല്. അതേസമയം ഏപ്രില് 25-30 ഓടെ ഡല്ഹി, ഹരിയാന, രാജസ്ഥാന്, തെലങ്കാന എന്നിവിടങ്ങളില് കോവിഡ് കേസുകള് ഉയരുമെന്നും ഐഐടി ശാസ്ത്രജ്ഞര് പറയുന്നു. മഹാരാഷ്ട്രയിലും ഛത്തീസ്ഗഢിലും ഇതിനകം തന്നെ രോഗവ്യാപനം അതിതീവ്ര ഘട്ടത്തിലാണെന്നും ശാസ്ത്രജ്ഞര് പറയുന്നു.
