ജനീവ : രണ്ടുവര്ഷത്തിനുളളില് കൊവിഡ് വൈറസ് വ്യാപനം നിയന്ത്രണ വിധേയമാകുമെന്ന് പ്രതീക്ഷിക്കുന്നതായി ലോകാരോഗ്യ സംഘടന മേധാവി ടെഡ്രോസ് അഥാനോം ഗെബ്രിയേസസ്. 1918-ല് റിപ്പോര്ട്ട് ചെയ്ത സ്പാനിഷ് ഫ്ളൂ രണ്ട് വര്ഷംകൊണ്ട് ഇല്ലാതായെന്നും എന്നാല് അന്നത്തേതില് നിന്ന് വിഭിന്നമായി സാങ്കേതികവിദ്യയുടെ ഇപ്പോഴത്തെ മുന്നേറ്റം ചുരുങ്ങിയ സമയത്തിനുളളില് വൈറസ് വ്യാപനം തടയാന് സഹായിക്കുമെന്നും ടെഡ്രോസ് പറഞ്ഞു.
ഇക്കാലത്ത് ആളുകള് പരസ്പരം ബന്ധപ്പെടാനുളള സാഹചര്യങ്ങള് കൂടുതലായതിനാല് വൈറസ് വ്യാപനത്തിനുളള സാധ്യതയും കൂടുതലാണ്. അതേസമയം, നമുക്കത് തടയാനുളള സാങ്കേതികതകളുണ്ട്, തടയാനുളള അറിവുണ്ടെന്നും ടെഡ്രോസ് പറഞ്ഞു. ദേശീയ ഐക്യവും ആഗോള ഐക്യദാര്ഢ്യത്തിന്റെ പ്രാധാനപ്പെട്ടതാണെന്നും അദ്ദേഹം പറഞ്ഞു.
സ്പാനിഷ് ഫ്ളൂ ബാധിച്ച് 50 ദശലക്ഷം ആളുകളാണ് മരിച്ചത്. 22.7 ദശലക്ഷം ആളുകളെ കൊവിഡ് വൈറസ് ബാധിച്ചപ്പോള് ഏകദേശം എട്ടുലക്ഷത്തോളം പേരാണ് വൈറസ് ബാധയെ തുടര്ന്ന് മരിച്ചത്.
പിപിഇ കിറ്റില് അഴിമതി നടത്തുന്നത് കൊലപാതകത്തിന് തുല്യമാണ്. കാരണം പിപിഇ കിറ്റ് ധരിക്കാതെ ആരോഗ്യ പ്രവര്ത്തകര് ജോലിചെയ്യുന്നത് അവരുടെ ജീവനുതന്നെ വെല്ലുവിളിയുയര്ത്തിയേക്കാം. അത് അവര് പരിപാലിക്കുന്ന ആളുകളുടെ ജീവനും ഭീഷണി ഉയര്ത്തുമെന്നും അദ്ദേഹം പറഞ്ഞു.
