കൊടുങ്ങല്ലൂര് : കോവിഡ് മൂന്നാം തരംഗ ഭീതിയില് കൊടുങ്ങല്ലൂര് കെ.എസ്.ആര്.ടി.സിക്ക് വന് വരുമാന നഷ്ടം. പ്രതിദിനം 17 മുതല് 19 വരെ സര്വീസുള്ള കൊടുങ്ങല്ലൂര് ബസ് സ്റ്റേഷനില് കളക്ഷന് മൂന്ന് ലക്ഷം വരെയായിരുന്നു. ഇതാകട്ടെ ഇപ്പോള് നേര് പകുതിയായി. മികച്ച കളക്ഷന് ഉണ്ടായിരുന്ന സര്വീസുകളെയെല്ലാം കോവിഡ് ഭീതി കാര്യമായി ബാധിച്ചു. യാത്രക്കാര് കുറഞ്ഞതാണ് വരുമാന ഇടിവിന് കാരണം. രാവിലെയും വൈകിട്ടുമാണ് ബസുകളില് ഭേദപ്പെട്ട രീതിയില് യാത്രക്കാരുള്ളത്.
സര്ക്കാര്, സര്ക്കാര് ഇതര മേഖലകളില് ജോലി ചെയ്യുന്നവരും തൊഴിലാളികളും ഉള്പ്പെടുന്ന അത്യാവശ്യക്കാര് മാത്രമാണ് ബസുകളെ ആശ്രയിക്കുന്നത്. ആഴ്ചയില് ഒന്നോ രണ്ടോ തവണ കൊടുങ്ങല്ലൂരില്നിന്ന് മലക്കപ്പാറയിലേക്ക് നടത്തിയിരുന്ന ടൂറിസ്റ്റ് സര്വീസുകളില്നിന്ന് പ്രതിമാസം ഒരു ലക്ഷത്തിലേറെയായിരുന്നു വരുമാനം. അതാകട്ടെ ഇപ്പോള് തീര്ത്തും ഇല്ലാതായി. ദീര്ഘദൂര സര്വീസുകളെയും എറണാകുളം – ഗുരുവായൂര് റൂട്ടില് വിടുന്ന വണ്ടികളെയും ഒരുപോലെ കളക്ഷന് കുറവ് ബാധിച്ചു. തിരുവനന്തപുരം സര്വവീസിനായിരുന്നു മുന്തിയ കളക്ഷന്.
പ്രതിദിനം 35,000 രൂപ വരെ കിട്ടിയിരുന്ന സ്ഥാനത്ത് 25,000 രൂപയില് താഴെയാണ് ഇപ്പോഴത്തെ വരവ്. നല്ലപോലെ ആളുണ്ടായിരുന്ന ശിവഗിരി മഠം സര്വീസില്നിന്ന് 25,000 വരെയായിരുന്നു പ്രതിദിന വരവ്. അതിപ്പോള് 12,000ത്തിലേക്ക് താഴ്ന്നു. കുമളി സര്വിസില് 26,000 വരെ കളക്ഷന് കിട്ടിയിരുന്നത് പകുതിയില് താഴെയായി. മൂന്നാര്, കോഴിക്കോട് ഉള്പ്പെടെയുള്ള സര്വിസുകള്ക്കും ‘കോവിഡ് ബാധയേറ്റു’.
