ന്യൂഡല്ഹി: കോവിഡ് കേസുകള് ഉയരുന്ന സാഹചര്യത്തില് കാണ്പൂരില് നിരോധനാജ്ഞ പ്രഖ്യാപിച്ച് ഉത്തര്പ്രദേശ് സര്ക്കാര്. വരാനിരിക്കുന്ന ആഘോഷങ്ങള്, പരീക്ഷകള് എന്നിവ കണക്കിലെടുത്താണ് ജില്ലയില് നിയന്ത്രണമേര്പ്പെടുത്തിയതെന്ന് അധികൃതര് അറിയിച്ചു. ഒരുമാസത്തേക്കാണ് നിയന്ത്രണം. 144ാം വകുപ്പ് പ്രകാരം അഞ്ചില് കൂടുതല് ആളുകള് കൂട്ടം ചേരാന് പാടില്ല.
പോലീസ് കമ്മീഷണറുടെ അനുമതിയില്ലാതെ പൊതുസ്ഥലങ്ങളില് കൂട്ടം ചേരാനോ ജാഥനടത്താനോ പാടില്ല. നിരോധനാജ്ഞ ലംഘിക്കുന്നവര്ക്കെതിരെ ഇന്ത്യന് ശിക്ഷാനിയമത്തിലെ 188ാം വകുപ്പ് പ്രകാരം കേസ് എടുക്കുമെന്നും അദ്ദേഹം വ്യക്തമാക്കി. 24 മണിക്കൂറിനിടെ ഇന്ത്യയില് 13,272 പുതിയ കേസുകള് റിപ്പോര്ട്ട് ചെയ്തു. 13,900 പേര് രോഗമുക്തരായി. വെള്ളിയാഴ്ച 15,756 കേസുകളാണ് റിപ്പോര്ട്ട് ചെയ്തത്. രാജ്യത്തെ നിലവിലെ കോവിഡ് കേസുകളുടെ എണ്ണം 1,01,116 ആണ്.
