തൃശൂര് : വിയ്യൂര് സെന്ട്രല് ജയില് തടവുകാരന് കൊവിഡ് ബാധിച്ച് മരിച്ചു. തൃശൂര് ഗവണ്മെന്റ് മെഡിക്കല് കോളജില് ചികിത്സയിലിരിക്കെയായിരുന്നു മരണം. പുത്തന്വീട്ടില് കൊച്ചുനാരായണന് (76) ആണ് ഇന്ന് ഉച്ചയോടെ മരിച്ചത്. എറണാകുളം നേരിയമംഗലം പാറവിള സ്വദേശിയായ കൊച്ചു നാരായണന് ജീവപര്യന്തം തടവുകാരനായിരുന്നു. ഈ മാസം 18 മുതല് ആശുപത്രിയില് ചികിത്സയിലായിരുന്നു. വാര്ധക്യസഹജമായ അസുഖങ്ങളെ തുടര്ന്ന് ചികിത്സക്കായി എത്തിയപ്പോള് നടത്തിയ പരിശോധനയിലാണ് കൊവിഡ് സ്ഥിരീകരിച്ചത്. പ്രമേഹ ബാധിതനായ ഇയാളുടെ കാല് മുന്പ് മുറിച്ച് മാറ്റിയിരുന്നു.
