പത്തനംതിട്ട : കോവിഡ് ബാധിതയെ ആംബുലന്സില് പീഡിപ്പിച്ച കേസില് പ്രതിയുടെ ജാമ്യാപേക്ഷ തള്ളി. ആംബുലന്സ് ഡ്രൈവര് കായംകുളം കീരിക്കാട് പനയ്ക്കച്ചിറയില് വീട്ടില് നൗഫലിന്റെ ജാമ്യാപേക്ഷയാണ് സെഷന്സ് കോടതി തള്ളിയത്. 2020 സെപ്റ്റംബര് 6ന് രാത്രി പത്തരയോടെ ആയിരുന്നു സംഭവം. അടൂര് ജനറല് ആശുപത്രിയില് നിന്നു പന്തളത്തെ സിഎഫ്എല്ടിസിയില് എത്തിക്കാന് ആരോഗ്യ വകുപ്പിന്റെ കനിവ് പദ്ധതിയുടെ ഭാഗമായ 108 ആംബുലന്സില് കയറ്റിവിട്ട പട്ടികജാതി വിഭാഗത്തില്പ്പെട്ട പെണ്കുട്ടിയെ ആറന്മുള ഭാഗത്തെ ഒഴിഞ്ഞ പ്രദേശത്തെത്തിച്ച് പീഡിപ്പിക്കുകയായിരുന്നു.
സംഭവം നടന്ന് അടുത്ത ദിവസം തന്നെ പ്രതിയെ പോലീസ് അറസ്റ്റ് ചെയ്തിരുന്നു. അന്നുമുതല് പ്രതി ജയിലിലാണ്. കേസില് കുറ്റപത്രം 90 ദിവസത്തിനുള്ളില് കോടതിയില് പോലീസ് സമര്പ്പിച്ചു. തുടര്ന്ന് പട്ടികജാതി പട്ടിക വര്ഗ പീഡന നിരോധന നിയമത്തിലെ വ്യവസ്ഥ പ്രകാരം വിചാരണ മുഴുവന് വിഡിയോ റെക്കോര്ഡ് ചെയ്യണമെന്ന് ആവശ്യപ്പെട്ട് നല്കിയ ഹര്ജി സെഷന്സ് കോടതി തള്ളിയതിനെ തുടര്ന്ന് പ്രോസിക്യൂഷന് ഹൈക്കോടതിയില് അപ്പീല് നല്കി. അങ്ങനെ വിചാരണ സ്റ്റേ ചെയ്യുകയായിരുന്നു. ഇതിനിടെ പ്രതി സെഷന്സ് കോടതിയില് ജാമ്യാപേക്ഷ നല്കി. കഴിഞ്ഞ ദിവസം വിശദമായി വാദം കേള്ക്കുകയും ഇന്നലെ ജാമ്യാപേക്ഷ തള്ളുകയയിരുന്നു. പ്രോസിക്യൂഷനു വേണ്ടി ജില്ലാ പബ്ലിക് പ്രോസിക്യൂട്ടര് എ.സി ഈപ്പന് ഹാജരായി.
