തിരുവനന്തപുരം : മെഡിക്കല് കോളേജില് വീണ്ടും ആത്മഹത്യ. കോവിഡ് നിരീക്ഷണത്തിലിരുന്ന രോഗിയാണ് ആത്മഹത്യ ചെയ്തത്. കൊല്ലം വയലാ സ്വദേശി നാസുറിദ്ദീനാണ് ആത്മഹത്യ ചെയ്തത്. ഇയാളെ ശസ്ത്രക്രിയയ്ക്ക് മുന്നോടിയായി കോവിഡ് നിരീക്ഷണത്തിലാക്കിയിരുന്നു.
ഇന്നു രാവിലെ ദിവസേനയുള്ള പരിശോധനകള്ക്കായി മുറിയിലെത്തിയ നഴ്സാണ് നാസുറിദ്ദീനെ അവശനിലയില് കണ്ടെത്തിയത്. ഉടന്തന്നെ ഐസിയുവില് പ്രവേശിപ്പിച്ചെങ്കിലും പത്തരയോടെ മരണം സംഭവിക്കുകയായിരുന്നു.
മരത്തില്നിന്ന് വീണു ദേഹമാസകലം പൊട്ടലുമായാണ് ഇയാളെ തിരുവനന്തപുരം മെഡിക്കല് കോളേജില് പ്രവേശിപ്പിച്ചത്. ഇയാള്ക്ക് ശസ്ത്രക്രിയ നടത്താന് ഡോക്ടര്മാര് നിര്ദ്ദേശിച്ചിരുന്നു. എന്നാല് പിന്നീട് കോവിഡ് ലക്ഷണങ്ങള് കാണിച്ചതിനെ തുടര്ന്ന് ഇയാളെ പ്രത്യേക മുറിയില് നിരീക്ഷണത്തിലാക്കുകയായിരുന്നു.
നേരത്തെ രണ്ടുപേര് കോവിഡ് നിരീക്ഷണത്തിലിരിക്കെ മെഡിക്കല് കോളേജില് ആത്മഹത്യ ചെയ്ത സംഭവത്തില് സര്ക്കാര് അന്വേഷണം പ്രഖ്യാപിച്ചിരുന്നു. അതിനിടെയാണ് മൂന്നാമത് ഒരു ആത്മഹത്യ കൂടി നടന്നിരിക്കുന്നത്.
