ബെംഗളൂരു : ബെംഗളൂരുവിൽ ചികിത്സയിലിരിക്കെ കോവിഡ് രോഗി തൂങ്ങി മരിച്ചു. കെ സി ജനറൽ ആശുപത്രിയിൽ ചികിത്സയിൽ ഉണ്ടായിരുന്ന 60 കാരിയാണ് തൂങ്ങി മരിച്ചത്. മകൾക്കും പേരക്കുട്ടിക്കുമൊപ്പം ജൂൺ 18നാണ് ഇവരെ ആശുപത്രിയിൽ പ്രവേശിപ്പിച്ചത്.
ബെംഗളുരുവിൽ മാത്രം കഴിഞ്ഞ ദിവസം 113 പേർക്കാണ് രോഗം സ്ഥിരീകരിച്ചത്. ബെംഗളൂരു നഗരത്തിലടക്കം കോവിഡ് വ്യാപനം തുടരുന്ന സാഹചര്യത്തിൽ കർണാടകത്തിൽ മുഖ്യമന്ത്രി വിളിച്ച സർവ്വകക്ഷിയോഗം ഇന്ന് നടക്കും. കൂടുതൽ നിയന്ത്രണങ്ങൾ നടപ്പാക്കുന്നതടക്കമുള്ള കാര്യങ്ങൾ ചർച്ചചെയ്യപ്പെടും. പത്താം ക്ലാസ്സ് പരീക്ഷയടക്കം നടക്കുന്ന സാഹചര്യത്തിൽ സമ്പൂർണ ലോക്ഡൗൺ പ്രായോഗികമല്ലെന്ന് മുഖ്യമന്ത്രി യെദ്യൂരപ്പ പറഞ്ഞിരുന്നു.
