ആലപ്പുഴ: കോവിഡ് ബാധിച്ച്‌ മരിച്ച സ്ത്രീയുടെ നഷ്ടപെട്ട സ്വര്‍ണ്ണം ആശുപത്രിയില്‍ നിന്ന് തന്നെ പൊലീസ് കണ്ടെടുത്തു. പള്ളിപ്പാട് സ്വദേശിനി വത്സലകുമാരിയുടെ ആറര പവന്‍ സ്വര്‍ണ്ണമാണ് വണ്ടാനം മെഡിക്കല്‍ കോളേജ് ആശുപത്രിയില്‍ നിന്ന് കണ്ടെടുത്തത്. അമ്ബലപ്പുഴ സിഐയുടെ നേതൃത്വത്തില്‍ നടത്തിയ പരിശോധനയിലാണ് സ്വര്‍ണ്ണം കണ്ടെടുത്തത്. ജീവനക്കാര്‍ക്ക് പറ്റിയ പിഴവാണ് സ്വര്‍ണ്ണം നഷ്ടമാകാന്‍ കാരണമായതെന്നാണ് പൊലീസ് നല്‍കുന്ന വിശദീകരണം.
എന്നാല്‍ ആഭരണങ്ങള്‍ നഷ്ടമായതിനെ തുടര്‍ന്ന് പോലീസിലും ആശുപത്രി സൂപ്രണ്ടിനും ബന്ധുക്കള്‍ പരാതി നല്‍കിയിരുന്നു. സംഭവത്തില്‍ ആഭ്യന്തര അന്വേഷണം തുടങ്ങിയതായി ആശുപത്രി സൂപ്രണ്ട് ഡോ.രാംലാല്‍ അറിയിച്ചിരുന്നു. വെള്ളിയാഴ്ച (മെയ്-21) ഉച്ചയോടെയാണ് ഹരിപ്പാട് പള്ളിപ്പാട് സ്വദേശിനി വത്സലാകുമാരി മരിച്ചത്. അതേസമയം ആശുപത്രി ജീവനക്കാര്‍ മൃതദേഹം വിട്ടുനല്‍കുമ്ബോള്‍ സ്വര്‍ണാഭരണങ്ങളെപ്പറ്റി കൃത്യമായ മറുപടി നല്‍കിയില്ല എന്നാണ് ബന്ധുക്കള്‍ പറയുന്നത്.
