തിരുവനന്തപുരം : സര്ക്കാര് പ്രഖ്യാപിച്ച നിയന്ത്രണങ്ങള് ഇന്ന് മുതല് പ്രാബല്യത്തില് വരും. ഇത് പ്രകാരം ഒന്പത് വരെയുള്ള ക്ലാസുകള് ഇന്ന് മുതല് ഓണ്ലൈനിലേക്ക് മാറും. രണ്ടാഴ്ചയാണ് സ്കൂളുകള് അടച്ചിരിക്കുന്നത്. തുടര്ന്ന് സാഹചര്യങ്ങള് വിലയിരുത്തിയാകും ബാക്കി കാര്യങ്ങള് തീരുമാനിക്കുക. ഓണ്ലൈന് ക്ലാസുകള് നടപ്പിലാക്കുന്നത് സംബന്ധിച്ച് മാര്ഗനിര്ദേശങ്ങള് കഴിഞ്ഞ ദിവസം പുറത്തുവിട്ടിരുന്നു. എല്ലാ കുട്ടികള്ക്കും ഡിജിറ്റല് പഠനത്തിനുള്ള സാങ്കേതിക സൗകര്യം സ്കൂള് അധികൃതര് ഉറപ്പ് വരുത്തണം. ഓണ് ലൈന് ക്ലാസിന്റെ ടൈം ടേബിള് ഇന്നലെ പ്രസിദ്ധീകരിച്ചിട്ടുണ്ട്.
എ കാറ്റഗറിയില് സാമൂഹ്യ, സാംസ്കാരിക, മത-സാമുദായിക, രാഷ്ട്രീയ, പൊതു പരിപാടികള്ക്കും വിവാഹം, മരണാനന്തര ചടങ്ങുകള്ക്കും പരമാവധി 50 പേര്ക്ക് പങ്കെടുക്കാവുന്നതാണ്. ബി. കാറ്റഗറിയില് സാമൂഹ്യ, സാംസ്കാരിക, മത, സാമുദായിക, രാഷ്ട്രീയ, പൊതു പരിപാടികള് ഒന്നും തന്നെ അനുവദിക്കില്ല. മതപരമായ ആരാധനകള് ഓണ്ലൈന് ആയി മാത്രം നടത്തേണ്ടതാണ്. വിവാഹം, മരണാനന്തര ചടങ്ങുകള്ക്ക് പരമാവധി 20 ആളുകളെ മാത്രമേ അനുവദിക്കൂ. സി കാറ്റഗറിയില് സാമൂഹ്യ, സാംസ്കാരിക, മത, രാഷ്ട്രീയ, സാമുദായിക, രാഷ്ട്രീയ, പൊതു പരിപാടികള് ഒന്നും തന്നെ അനുവദിക്കില്ല. മതപരമായ ആരാധനകള് ഓണ്ലൈന് ആയി മാത്രം നടത്തേണ്ടതാണ്. വിവാഹം, മരണാനന്തര ചടങ്ങുകള്ക്ക് പരമാവധി 20 ആളുകളെ മാത്രമേ അനുവദിക്കൂ. സിനിമ തീയേറ്ററുകള്, സ്വിമ്മിംഗ് പൂളുകള്, ജിമ്മുകള് എന്നിവയുടെ പ്രവര്ത്തനം അനുവദിക്കില്ല. ബിരുദ – ബിരുദാനന്തര തലത്തിലെ ഫൈനല് ഇയര് ക്ലാസ്സുകളും, പത്ത്, പന്ത്രണ്ട് ക്ലാസ്സുകളും ഒഴികെയുള്ള എല്ലാ ക്ലാസ്സുകളും (ട്യൂഷന് സെന്ററുകള് ഉള്പ്പെടെ) ഓണ്ലൈന് സംവിധാനത്തിലൂടെ മാത്രമേ അനുവദിക്കൂ. റസിഡന്ഷ്യല് വിദ്യാഭ്യാസ സ്ഥാപനങ്ങള് ബയോ ബബിള് മാതൃകയില് പ്രവര്ത്തിക്കുകയാണെങ്കില് ഇത് ബാധകമല്ല.
