ന്യൂഡല്ഹി : രാജ്യത്ത് കോവിഡിന്റെ അതിതീവ്ര വ്യാപനം കുറയുന്നതായി റിപ്പോര്ട്ട്. ജനുവരി ആദ്യ ആഴ്ചയില് 20,000 ത്തില് ആയിരുന്ന കോവിഡ് കണക്ക് ഏഴാം തിയതി പിന്നിട്ടതോടെയാണ് കുതിച്ചുയര്ന്നത്. എന്നാല് ഇപ്പോള് വൈറസിന്റെ വ്യാപന ശേഷി കുറഞ്ഞതായാണ് റിപ്പോര്ട്ടുകള് സൂചിപ്പിക്കുന്നത്. ജനുവരി 7 മുതല് 13 വരെയുള്ള ആഴ്ചയിലെ കണക്കുപ്രകാരം, വൈറസിന്റെ വ്യാപനശേഷിയായ ആര് വാല്യു 2.2 ആയി കുറഞ്ഞു. തൊട്ടു മുന്പത്തെ ആഴ്ച ഇത് ഇതുവരെയുള്ളതില് ഏറ്റവും ഉയര്ന്ന നിരക്കായ 4 ലേക്ക് എത്തിയിരുന്നു.
മറ്റു പ്രതിരോധ മാര്ഗങ്ങളില്ലെങ്കില് ശരാശരി എത്ര പേര്ക്കു വരെ സമ്പര്ക്കം വഴി രോഗം വരാമെന്ന അനുമാനമാണ് ആര് വാല്യു. ഇതനുസരിച്ച്, കോവിഡ് പിടിപെട്ട ഓരോരുത്തരില് നിന്നും മറ്റു 4 പേര്ക്കു കൂടി കോവിഡ് പിടിപെടാം. എന്നാല് പുതിയ കണക്കു പ്രകാരം ഒരാളില് നിന്ന് 2.2 പേര്ക്ക് എന്ന നിരക്കിലാണ് വൈറസിന്റെ വ്യാപനം. കോവിഡ് ഏറ്റവും ശക്തമായിരുന്ന രണ്ടാം കോവിഡ് തരംഗത്തില് പോലും 1.69 ആയിരുന്നു ആര് വാല്യു. ഈ നിരക്ക് ഒന്നില് നിന്നു താഴേക്ക് എത്തുമ്പോഴാണ് കോവിഡ് വ്യാപനം കുറയുക. ഐഐടി മദ്രാസ് തയാറാക്കിയ റിപ്പോര്ട്ടിലാണ് ഇന്ത്യയിലെ വൈറസ് വ്യാപനത്തിന്റെ ഗതി സൂചിപ്പിച്ചിരിക്കുന്നത്.
