കോന്നി : ഐരവണിൽ മോഷണകേസിലെ പ്രതികളെ ഉടന് അറസ്റ്റ് ചെയ്യണമെന്ന് സി പി ഐ സംസ്ഥാന കൗൺസിലംഗം പി ആർ ഗോപിനാഥൻ ആവശ്യപ്പെട്ടു. പോലീസിന്റെ തികഞ്ഞ അനാസ്ഥയാണ് ഇക്കാര്യത്തില് ഉണ്ടായിരിക്കുന്നതെന്നും ഇതവസാനിപ്പിക്കുവാന് തയ്യാറായില്ലെങ്കില് സമരം കൂടുതല് ശക്തമാക്കുമെന്നും അദ്ദേഹം പറഞ്ഞു. സി.പി.ഐ ഐരവൺ ലോക്കൽ കമ്മറ്റിയുടെ നേതൃത്വത്തിൽ സംഘടിപ്പിച്ച കോന്നി പോലീസ് സ്റ്റേഷൻ മാർച്ച് ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കുമ്മണ്ണൂർ, ഐരവൺ അടക്കമുള്ള പ്രദേശങ്ങളിൽ സാമൂഹ്യ വിരുദ്ധശല്യം വർദ്ധിക്കുകയാണ്. കോന്നി പോലീസ് സ്റ്റേഷനിൽ നൽകിയിട്ടുള്ള നിരവധി കേസുകളിൽ പലതവണ അന്വേഷണം വേണമെന്ന് ആവശ്യപ്പെട്ടിട്ടും നടപടിയുണ്ടായിട്ടില്ല. സാമ്പത്തിക അഴിമതി ഉൾപ്പെടെയാണ് നടക്കുന്നത്. സി പി ഐ ആനകുത്തി ബ്രാഞ്ച് അംഗം പുഷ്പാംഗതന്റെ വീട്ടിൽ ഒരു മാസം മുൻപുണ്ടായ മോഷണക്കേസിലെ പ്രതികളെ പിടികൂടുവാനും പോലീസിന് കഴിഞ്ഞിട്ടില്ല.
സി.പി.ഐ ഐരവൺ ലോക്കൽ കമ്മറ്റി അസിസ്റ്റന്റ് സെക്രട്ടറി ബിനോയ് ജോൺ അദ്ധ്യക്ഷത വഹിച്ചു. സി.പി.ഐ കോന്നി മണ്ഡലം അസിസ്റ്റന്റ് സെക്രട്ടറി കെ രാജേഷ്, സി പി ഐ ഐരവൺ ലോക്കൽ സെക്രട്ടറി വിജയ വിൽസൺ, ജോൺഫിലിപ്പ്, ഹംസ, സുരേന്ദ്രൻ, മണിയമ്മ, തങ്കച്ചൻ, മധു, സി കെ ശാമുവേൽ, റെജി, വിനീത് കോന്നി, ബിജി തുടങ്ങിയവർ സംസാരിച്ചു.
