എഴുമറ്റൂര്: കഴിഞ്ഞ ദിവസമുണ്ടായ അപ്രതീക്ഷിത വെള്ളപ്പൊക്കത്തില് നാശനഷ്ടം സംഭവിച്ചവര്ക്ക് അടിയന്തിര ധനസഹായം നല്കണമെന്ന് സി.പി.ഐ എഴുമറ്റൂര് മണ്ഡലം കമ്മിറ്റി ആവശ്യപ്പെട്ടു. ചുങ്കപ്പാറയിലെ വ്യാപാരികള്ക്ക് ലക്ഷകണക്കിന് രൂപയുടെ നാശനഷ്ടമാണ് ഉണ്ടായിരിക്കുന്നത്. ഇങ്ങനെ നഷ്ടമുണ്ടായവരില് നാല്പ്പതോളം വ്യാപാരികളാണ് ഉള്പ്പെടുന്നത്. ഇവര്ക്ക് പ്രത്യേക പാക്കേജില് ഉള്പ്പെടുത്തി സാമ്പത്തിക സഹായം നല്കണമെന്നും ആവശ്യമുയര്ന്നു. കൂടാതെ നിരവധി വീടുകളിലും കൃഷി സ്ഥലങ്ങളിലും വെള്ളം കയറി വലിയ നാശം നേരിട്ടിട്ടുണ്ട്. ഇവര്ക്കുള്ള സഹായവും അടിയന്തിരമായി നല്കണമെന്ന് റവന്യൂ, കൃഷി വകുപ്പ് മന്ത്രിമാരോട് ആവശ്യപ്പെട്ടതായി മണ്ഡലം സെക്രട്ടറി കെ സതീശ്, ജില്ലാ കൗണ്സിലംഗങ്ങളായ അഡ്വ. മനോജ് ചരളേല്, അനീഷ് ചുങ്കപ്പാറ എന്നിവര് അറിയിച്ചു.
