ന്യൂഡല്ഹി : സി.പി.എം കേന്ദ്ര കമ്മിറ്റി യോഗം ഇന്ന് ഡല്ഹിയില്. മുഖ്യമന്ത്രി പിണറായി വിജയനടക്കമുള്ള കേരളത്തിലെ നേതാക്കള് മൂന്നുദിവസത്തെ യോഗത്തില് പങ്കെടുക്കും. കോവിഡ് സാഹചര്യത്തെത്തുടര്ന്ന് ഒന്നരവര്ഷത്തിനുശേഷമാണ് നേതാക്കള് നേരിട്ടു പങ്കെടുക്കുന്ന സി.സി യോഗം. സാമൂഹികാകലം പാലിച്ച് അംഗങ്ങളെ ഇരുത്താന് സൗകര്യത്തിനായി പാര്ട്ടി ആസ്ഥാനമായ എ.കെ.ജി ഭവനു പകരം സി.പി.എം ദേശീയ പഠനകേന്ദ്രമായ സുര്ജിത് ഭവനിലാണ് ഇത്തവണ യോഗം.
കോണ്ഗ്രസ് നേതൃത്വം നല്കുന്നതിനെ കേരളഘടകം അംഗീകരിക്കുന്നില്ല. കോണ്ഗ്രസ് പലപ്പോഴും വര്ഗീയതയുമായി സമരസപ്പെടുന്നുവെന്നും ഇടതുപക്ഷത്തിന്റെ മതേതര നിലപാടാണ് കേരളത്തില് ഭരണത്തുടര്ച്ച നല്കിയതെന്നും സംസ്ഥാനത്തെ നേതാക്കള് ഉയര്ത്തിക്കാട്ടുന്നു. എന്നാല്, വിശാല മതേതര സഖ്യം വേണമെന്നാണ് ബംഗാള് ഘടകം അടക്കം ആവശ്യപ്പെടുന്നത്. ദേശീയ സാഹചര്യവും സംസ്ഥാനങ്ങളിലെ തെരഞ്ഞെടുപ്പ് രാഷ്ട്രീയവും വ്യത്യസ്തമാണെന്ന് കോണ്ഗ്രസ് സഖ്യത്തെ അനുകൂലിക്കുന്നവര് വിശദീകരിക്കുന്നു. തെരഞ്ഞെടുപ്പിനു മുന്പ് മുന്നണിവേണമെന്നില്ല എന്ന നിലപാടാണ് ജനറല് സെക്രട്ടറി സീതാറാം യച്ചൂരി പങ്കുവച്ചത്.
