ഡൽഹി : സിപിഎം കേന്ദ്ര കമ്മിറ്റി യോഗം ഇന്ന് അവസാനിക്കും. കേരളത്തിലെ ലോക്സഭാ തിരഞ്ഞെടുപ്പിലുണ്ടായ കനത്ത തോൽവിയെക്കുറിച്ച് യോഗത്തിൽ വിശദമായ ചർച്ചകൾ നടന്നു. പാർട്ടിയുടെ പരമ്പരാഗത കേന്ദ്രങ്ങളിൽപ്പോലുമുണ്ടായ തിരിച്ചടി, അണികൾ പാർട്ടിയെ തിരുത്തിയതുപോലെയാണ് എന്നാണ് ചർച്ചയിൽ പങ്കെടുത്തവർ അഭിപ്രായപ്പെട്ടത്. കേരളത്തിലെ ന്യൂനപക്ഷ വോട്ടുകൾ യുഡിഎഫിന് അനുകൂലമായതാണ് പരാജയത്തിന് പ്രധാന കാരണമായി യോഗം വിലയിരുത്തുന്നത്. ഈ സാഹചര്യത്തിൽ, ന്യൂനപക്ഷങ്ങളെ പാർട്ടിയോട് ചേർത്തുനിർത്താൻ ആവശ്യമായ ശക്തമായ ഇടപെടലുകൾ ഉണ്ടാകണമെന്ന് യോഗത്തിൽ ആവശ്യമുയർന്നു.
ആരോഗ്യപരമായ പ്രയാസങ്ങൾ നേരിടുന്നുണ്ടെങ്കിലും മുഖ്യമന്ത്രി പിണറായി വിജയൻ യോഗത്തിൽ പങ്കെടുത്തു. തിരഞ്ഞെടുപ്പ് പരാജയത്തെക്കുറിച്ചുള്ള പാർട്ടിയുടെ ഔദ്യോഗികമായ തിരുത്തൽ നടപടികൾ വരും ദിവസങ്ങളിൽ ഉണ്ടാകുമെന്നാണ് സൂചന. കേന്ദ്ര കമ്മിറ്റി യോഗത്തിന്റെ അവസാന ദിനമായ ഇന്ന് പാർട്ടി എന്ത് തീരുമാനം എടുക്കും എന്നതാണ് രാഷ്ട്രീയ കേരളം ഉറ്റുനോക്കുന്നത്.
