തിരുവനന്തപുരം : സംസ്ഥാനത്തെ കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്നത് സംബന്ധിച്ച സുപ്രധാന റിപ്പോർട്ട് ഗതാഗത സെക്രട്ടറി ഇന്ന് സർക്കാരിന് സമർപ്പിക്കും. പദ്ധതി നടപ്പിലാക്കുന്നതുമായി ബന്ധപ്പെട്ട സാമ്പത്തികവും പ്രായോഗികവുമായ വശങ്ങൾ പരിശോധിച്ച ശേഷമാണ് ഗതാഗത സെക്രട്ടറി റിപ്പോർട്ട് തയ്യാറാക്കിയിരിക്കുന്നത്. കെഎസ്ആർടിസി നേരത്തെ സമർപ്പിച്ച നഷ്ടക്കണക്കുകളുടെ അടിസ്ഥാനത്തിലാണ് പുതിയ റിപ്പോർട്ട് തയ്യാറാക്കിയിട്ടുള്ളത്.
സ്ത്രീകൾക്ക് സൗജന്യ യാത്ര അനുവദിക്കുമ്പോൾ കെഎസ്ആർടിസിക്ക് ഉണ്ടാകാൻ സാധ്യതയുള്ള അധിക ബാധ്യതയെക്കുറിച്ചും റിപ്പോർട്ടിൽ പരാമർശിക്കുന്നുണ്ട്. ഗതാഗത സെക്രട്ടറി സമർപ്പിക്കുന്ന ഈ റിപ്പോർട്ട് നാളെ ചേരുന്ന മന്ത്രിസഭായോഗം വിശദമായി ചർച്ച ചെയ്യും. ഇതിനുശേഷമായിരിക്കും പദ്ധതി നടപ്പിലാക്കുന്നത് സംബന്ധിച്ച അന്തിമ തീരുമാനത്തിലേക്ക് സർക്കാർ എത്തുക.
