പത്തനംതിട്ട : സി.പി.എം ഇലന്തൂര് ലോക്കല് കമ്മിറ്റി അംഗവും മുന് എസ്.എഫ്.ഐ ജില്ലാ പ്രസിഡന്റും മഹാത്മഗാന്ധി യൂണിവേഴ്സിറ്റി യൂണിയന് ചെയര്മാനും ജില്ലാ ലൈബ്രറി കൗണ്സില് അംഗവുമായിരുന്ന പി.ജെ. ജോണ്സണ് സി.പി.എമ്മില് നിന്നും രാജിവെച്ച് കോണ്ഗ്രസ് അംഗത്വം സ്വീകരിച്ചു. ഇലന്തൂര് ബ്ലോക്ക് പഞ്ചായത്ത് വികസനകാര്യ സ്റ്റാന്റിംഗ് കമ്മിറ്റി ചെയര്മാന്, താലൂക്ക് ലൈബ്രറി കൗണ്സില് സെക്രട്ടറി എന്നീ നിലകളിലും പ്രവര്ത്തിച്ചിട്ടുള്ള ജോണ്സണ് അടുത്തകാലത്ത് ആരോഗ്യവകുപ്പ് മന്ത്രി വീണാ ജോര്ജിന്റെ ഭരണപരമായ കെടുകാര്യസ്ഥതയെക്കുറിച്ച് സമൂഹമാധ്യമങ്ങളില് വിമര്ശനം ഉന്നയിച്ചിതിനെതുടര്ന്ന് സി.പി.എമ്മില് പൊട്ടിത്തെറി ഉണ്ടാക്കിയിരുന്നു.
ഡി.സി.സി ഓഫീസായ പത്തനംതിട്ട രാജീവ് ഭവനില് എത്തിയാണ് ജോണ്സണ് അംഗത്വം സ്വികരിച്ചത്. ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് അദ്ദേഹത്തിന് കോണ്ഗ്രസ് അംഗത്വം നല്കി സ്വീകരിച്ചു. വൈസ് പ്രസിഡന്റ് എ. സുരേഷ് കുമാര്, സംഘടനാകാര്യ ജനറല് സെക്രട്ടറി സാമുവല് കിഴക്കുപുറം, പത്തനംതിട്ട ബ്ലോക്ക് കോണ്ഗ്രസ് കമ്മിറ്റി പ്രസിഡന്റ് ജെറി മാത്യു സാം, ഇലന്തൂര് മണ്ഡലം പ്രസിഡന്റ് കെ.പി. മുകുന്ദന്, കോണ്ഗ്രസ് നേതാക്കളായ ജയന് ഓമല്ലൂര്, ശശി ഭൂഷണ്, സോജന് ജോര്ജ് എന്നിവര് സ്വീകരണ യോഗത്തില് പങ്കെടുത്ത് പ്രസംഗിച്ചു.
