പറവൂര്‍ : മേഖലയില്‍ എല്‍.ഡി.എഫ് ഭരിക്കുന്ന സഹകരണ ബാങ്കുകളില്‍ നടത്തിയ കോടികളുടെ വായ്പ തട്ടിപ്പുകള്‍ ഒന്നിനുപിറകെ ഒന്നായി പുറത്തുവരുന്നു. കോണ്‍ഗ്രസ് ഭരിക്കുന്ന സഹകരണ ബാങ്കുകളില്‍ നിയമവിരുദ്ധമായി വായ്പ നല്‍കുന്നെന്ന് ആരോപിച്ച്‌ ധര്‍ണയും അനിശ്ചിതകാല സമരവും മറ്റും നടത്തിയ സി.പി.എം ഇതോടെ വെട്ടിലായി. സി.പി.എമ്മിന്റെ ഏരിയ കമ്മിറ്റി അംഗങ്ങള്‍ ഉള്‍പ്പെട്ട ബാങ്ക് ഭരണസമിതിക്കാര്‍ കോടികളുടെ വായ്പ തട്ടിപ്പ് നടത്തിയിരിക്കുന്നെന്ന വിവരമാണ് പുറത്തുവന്നിരിക്കുന്നത്.
എല്‍.ഡി.എഫ് ഭരിക്കുന്ന പറവൂര്‍ വടക്കേക്കര സഹകരണ ബാങ്കില്‍നിന്ന് ഇഷ്ടികക്കളം നടത്താനായി പലരുടെയും പേരില്‍ 10 കോടി രൂപയാണ് ഒരു വ്യക്തിക്ക് വായ്പ നല്‍കിയിരിക്കുന്നത്. ഇതിന് ഈടായി നല്‍കിയത് ബാങ്കിന്റെ പ്രവര്‍ത്തനപരിധിക്ക് പുറത്ത് തൃശൂര്‍ ജില്ലയിലെ മാള, മൂഴിക്കുളം വില്ലേജുകളില്‍പെട്ട വയലുകളാണ്.
കൂലിപ്പണിക്കാരുടെ പേരിലും കോടികളാണ് വായ്പ അനുവദിച്ചിരിക്കുന്നത്. പുത്തന്‍വേലിക്കര സ്വദേശിയാണ് ബാങ്ക് ഭരണസമിതിയിലെ ഉന്നതരുടെ ഒത്താശയോടെ 10 കോടി കീശയിലാക്കിയത്. ഇയാള്‍ പറവൂര്‍ വടക്കേക്കര സഹകരണ ബാങ്കില്‍ ഈടായി നല്‍കിയ വയല്‍ മറ്റ് സഹകരണ ബാങ്കുകളിലും ഈട് നല്‍കി കോടികള്‍ വാങ്ങിയിട്ടുണ്ട്. ചേന്ദമംഗലം സഹകരണ ബാങ്കില്‍നിന്ന് അഞ്ചുപേരുടെ പേരില്‍ രണ്ടര കോടിയാണ് വായ്പയെടുത്തിട്ടുള്ളത്.
സമാന രീതിയില്‍ പറവൂര്‍ താലൂക്ക് സഹകരണ ബാങ്ക്, മാഞ്ഞാലി സഹകരണ ബാങ്ക്, എന്നിവിടങ്ങളില്‍നിന്നും ഭരണക്കാരെ സ്വാധീനിച്ച്‌ കോടികള്‍ കൈക്കലാക്കി. മാഞ്ഞാലി സ്വദേശി മനാഫ് നാല് ബാങ്കില്‍ പോയി ഒപ്പിട്ടു കൊടുത്തു. എന്നാല്‍, എത്ര തുകയാണ് വായ്പ എടുത്തിരിക്കുന്നതെന്ന് അറിയില്ല. വായ്പ എടുത്തിരിക്കുന്നവരെല്ലാം സാധാരണക്കാരാണ്. ഇവര്‍ക്ക് ഇടപാടില്‍ പങ്കില്ലെന്ന് അറിയാമായിരുന്നിട്ടും ബാങ്കുകാര്‍ വെട്ടിപ്പിന് കൂട്ടുനില്‍ക്കുകയായിരുന്നു.
കോണ്‍ഗ്രസ് ഭരിക്കുന്ന ചേന്ദമംഗലം ബാങ്ക് പ്രവര്‍ത്തന പരിധിക്ക് പുറത്തുള്ള വസ്തു ഈടായി സ്വീകരിച്ച്‌ വായ്പ നല്‍കിയതില്‍ സഹകരണ വകുപ്പ് അന്വേഷണത്തിന് ഉത്തരവിട്ടിട്ടുണ്ട്. സമാനരീതിയില്‍ അതേ വയല്‍ ഈട് നല്‍കി എല്‍.ഡി.എഫ് ഭരിക്കുന്ന നാല് ബാങ്ക് വായ്പ നല്‍കിയതിനെക്കുറിച്ച്‌ വിജിലന്‍സ് അന്വേഷണം വേണമെന്ന് കോണ്‍ഗ്രസ് ആവശ്യപ്പെട്ടിട്ടുണ്ട്. സഹകരണ വകുപ്പ് മന്ത്രിക്കും ഉന്നത ഉദ്യോഗസ്ഥര്‍ക്കും പരാതി നല്‍കാനും തീരുമാനിച്ചിട്ടുണ്ട്.
