പത്തനംതിട്ട : സീതത്തോട് പഞ്ചായത്തിലെ മുണ്ടന്പാറയ്ക്ക് സമീപം റോഡില് വിള്ളല് ഉണ്ടായതുമായി ബന്ധപ്പെട്ട് ജില്ലാ ജിയോളജിസ്റ്റിന്റെ നേതൃത്വത്തിലുള്ള വിദഗ്ധ സംഘം സ്ഥല പരിശോധനയ്ക്കു ശേഷം തയാറാക്കിയ റിപ്പോര്ട്ട് ജില്ലാ ദുരന്തനിവാരണ അതോറിറ്റിക്ക് സമര്പ്പിച്ചു.
മലയുടെ മുകള് ഭാഗത്ത് നിന്നുണ്ടാകുന്ന നീര്ച്ചാലുകളെ തടസ്സപ്പെടുത്തി കൊണ്ടുള്ള കൃഷി രീതിയും ഉയര്ന്ന ചരിവും അതിവൃഷ്ടിയുമാണ് റോഡിലെ വിള്ളലിന് കാരണമായി പഠനത്തില് കണ്ടെത്തിയിട്ടുള്ളത്. ഈ പ്രദേശത്തിന്റെ ഹസാഡ് മാപ്പിംഗ്, ഉരുള്പൊട്ടല് ഉള്പ്പെടെ പ്രകൃതി ദുരന്തങ്ങള് ഭാവിയില് ഉണ്ടാകാനുള്ള സാധ്യത സംബന്ധിച്ച് സമഗ്രമായ പഠനം നടത്തുവാന് സര്ക്കാരിലേക്ക് ശുപാര്ശ ചെയ്യും.
