കൊച്ചി : പാക് മാഫിയയിലൂടെ അതിര്ത്തി കടന്ന് ഇന്ത്യയിലേക്ക് എത്തുന്നത് കോടിക്കണക്കിന് രൂപയുടെ ലഹരിമരുന്ന്. ഈ വര്ഷം ഫെബ്രുവരിയില് തന്നെ എത്തിയത് 750 കിലോഗ്രാം ലഹരിമരുന്നാണ് ഗുജറാത്ത് തീരത്തുനിന്ന് പിടികൂടിയത്. ഹെറോയിനും മെത്താഫെറ്റമിനും ചരസും ഉള്പ്പെടുന്ന ഈ വന്ശേഖരത്തിനു പിന്നിലും ഹാജി സലിം ഗ്രൂപ്പിന്റെ പങ്കാണ് നര്ക്കോട്ടിക്സ് കണ്ട്രോള് ബ്യൂറോ (എന്.സി.ബി.) കണ്ടെത്തിയത്.
കഴിഞ്ഞദിവസം കൊച്ചി തീരത്ത് പിടികൂടിയ 200 കിലോഗ്രാം ഹെറോയിനിലും അന്വേഷണം നീളുന്നത് ഹാജി സലിം ശൃംഖലയിലേക്കുതന്നെ. ഇവര്വഴിയുള്ള ലഹരിമരുന്നുകടത്ത് വര്ഷങ്ങളായി തുടരുകയാണെന്ന് എന്.സി.ബി. ഡെപ്യൂട്ടി ഡയറക്ടര് ജനറല് (ഓപ്പറേഷന്സ്) സഞ്ജയ് കുമാര് സിങ് പറഞ്ഞു. 2021-ല് എന്.സി.ബി. കൊച്ചി യൂണിറ്റ് 637 കിലോഗ്രാം ഹെറോയിന് പിടികൂടിയിരുന്നു. ഇത് എത്തിയതും ഹാജി സലിം ശൃംഖലയിലൂടെയാണ്.
കഴിഞ്ഞദിവസം പിടികൂടിയ ഹെറോയിന് ശ്രീലങ്കയില് വിതരണത്തിന് ഉദ്ദേശിച്ചുള്ളതാണെന്നാണ് വിവരം. പിടിയിലായവരെല്ലാം ഇറാനിലെ കൊണാര്ക്ക് മേഖലയില്നിന്നുള്ളവരാണ്. പാകിസ്താനിലെ ബലൂചിസ്ഥാനോടു ചേര്ന്നുകിടക്കുന്ന സ്ഥലമാണിത്. സാറ്റലൈറ്റ് ഫോണുകളും മൂന്ന് സ്മാര്ട്ട് ഫോണും ഇവരില്നിന്ന് കണ്ടെത്തിയെങ്കിലും മറ്റു തിരിച്ചറിയല് രേഖകളൊന്നും ലഭിച്ചിട്ടില്ല.