റാഞ്ചി; ജാര്ഖണ്ഡില് വീട്ടില് പരിശോധന നടത്താനെത്തിയ പോലീസ് ഉറങ്ങിക്കിടക്കുകയായിരുന്ന നാലു ദിവസം പ്രായമുള്ള കുഞ്ഞിനെ തൊഴിച്ചുകൊന്നുവെന്ന് ആരോപണം. ജാര്ഖണ്ഡിലെ ഗിരിധിഹ് ജില്ലയിലാണ് സംഭവം. സംഭവത്തില് ജാര്ഖണ്ഡ് മുഖ്യമന്ത്രി ഹേമന്ത് സോറന് അന്വേഷണത്തിന് ഉത്തരവിട്ടു. വിഷയം ശ്രദ്ധയില് പെട്ടിട്ടുണ്ടെന്നും കുഞ്ഞിന്റെ മൃതദേഹം പോസ്റ്റ് മോര്ട്ടത്തിന് അയച്ചിട്ടുണ്ടെന്നും സംഭവത്തില് അന്വേഷണം നടക്കുന്നുണ്ടെന്നും പോലീസ് ഡെപ്യൂട്ടി സൂപ്രണ്ട് സഞ്ജയ് റാണ പറഞ്ഞു.
ഒരു കേസുമായി ബന്ധപ്പെട്ട് കുഞ്ഞിന്റെ മുത്തച്ഛന് ഭൂഷണ് പാണ്ഡെയെ തിരഞ്ഞാണ് പോലീസ് വീട്ടിലെത്തിയത്. പരിശോധന കഴിഞ്ഞ് പോലീസ് തിരികെ പോയപ്പോള് കുഞ്ഞിനെ മരിച്ച നിലയില് കണ്ടെത്തുകയായിരുന്നുവെന്ന് അമ്മ നേഹ പറഞ്ഞു. പോലീസ് പരിശോധനക്കിടെ കുഞ്ഞിനെ ചവിട്ടിക്കൊന്നതാണെന്ന് കുഞ്ഞിന്റെ അമ്മയും കുടുംബാംഗങ്ങളും ആരോപിക്കുന്നു. അതേസമയം പ്രഥമദൃഷ്ട്യാ, കുഞ്ഞിന്റെ ശരീരത്തില് ബാഹ്യമായ മുറിവുകള് കണ്ടെത്തിയില്ലെന്ന് ഗിരിധിഹ് പോലീസ് സൂപ്രണ്ട് പറഞ്ഞു.
