ഡൽഹി : ഇൻഡി സഖ്യത്തിനെതിരെ ആഞ്ഞടിച്ച് ബിജെപി ദേശീയ അദ്ധ്യക്ഷൻ ജെ പി നദ്ദ. കോൺഗ്രസും ഇൻഡി സഖ്യവും സ്വന്തം കുടുംബത്തിന് വേണ്ടി മാത്രം പ്രവർത്തിക്കുന്നവരാണെന്ന് അദ്ദേഹം രൂക്ഷമായി വിമർശിച്ചു. കോൺഗ്രസിന് പിന്നാക്ക വിഭാഗക്കാരെയും പാവപ്പെട്ടവരെയും സ്വന്തം കുടുംബത്തെ പോലെ കാണാൻ സാധിക്കില്ലെന്നും ദളിതരെ ഇവർ വോട്ടിനായി മാത്രം ഉപയോഗപ്പെടുത്തുകയാണെന്നും അദ്ദേഹം പറഞ്ഞു. യുപി മുഖ്യമന്ത്രി യോഗി ആദിത്യനാഥിനൊപ്പം ആഗ്രയിൽ നടന്ന സമ്മേളനത്തിൽ സംസാരിക്കുകയായിരുന്നു അദ്ദേഹം.
” കോൺഗ്രസിനെ സംബന്ധിച്ചിടത്തോളം സാധാരണക്കാരും പാവപ്പെട്ടവരുമെല്ലാം വോട്ടിനായുള്ള കേവലം ഉപകരണങ്ങൾ മാത്രമാണ്. അവർക്കൊരിക്കലും ജനങ്ങളെ സ്വന്തമായി കാണാൻ സാധിക്കില്ല. എന്നും അവരവരുടെ കുടുംബം മാത്രം മുൻപന്തിയിൽ വരണമെന്നും അവരുടെ ഭാവി സുരക്ഷിതമാകണമെന്നും വിചാരിക്കുന്നവരാണ്. സോണിയ- രാഹുൽ, കരുണാനിധി സ്റ്റാലിൻ- ഉദയനിധി സ്റ്റാലിൻ, ശരദ് പവാർ വിഭാഗം ഇവരെല്ലാം ഈ പറഞ്ഞതിന് ഉദാഹരണങ്ങളാണ്.” ജെ പി നദ്ദ വ്യക്തമാക്കി.
