പത്തനംതിട്ട: ആരോഗ്യ മേഖലയിലെ ഗുരുതരമായ ഭരണ പരാജയങ്ങൾക്കും സർക്കാർ ആശുപത്രികളിൽ തുടർച്ചയായി ഉണ്ടാകുന്ന സുരക്ഷാ വീഴ്ചകൾക്കുമെതിരെ ആരോഗ്യമന്ത്രിയുടെ ഓഫീസിന് മുന്നിൽ യൂത്ത് കോൺഗ്രസ് സംസ്ഥാന സെക്രട്ടറി നഹാസ് പത്തനംതിട്ടയുടെ നേതൃത്വത്തിൽ യൂത്ത് കോൺഗ്രസ് പ്രവർത്തകർ പ്രതിഷേധം സംഘടിപ്പിച്ചു. “DANGER ZONE – SYSTEM FAILURE AREA” എന്ന ബോർഡ് സ്ഥാപിച്ചാണ് പ്രതിഷേധം നടത്തിയത്. ആരോഗ്യ സംവിധാനത്തിൽ നിലനിൽക്കുന്ന അശ്രദ്ധയും ഉത്തരവാദിത്വക്കുറവും ജനങ്ങളുടെ ജീവൻ അപകടത്തിലാക്കുന്ന സാഹചര്യമാണ് നിലവിലുള്ളതെന്ന് യൂത്ത് കോൺഗ്രസ് നേതൃത്വം ആരോപിച്ചു. സർക്കാർ ആശുപത്രികളിൽ സംഭവിക്കുന്ന ഗുരുതര പിഴവുകൾ ഒറ്റപ്പെട്ട സംഭവങ്ങളല്ല, മറിച്ച് സമഗ്രമായ സിസ്റ്റം തകരാറിന്റെ തെളിവുകളാണെന്ന് പ്രതിഷേധക്കാർ ചൂണ്ടിക്കാട്ടി.
ആരോഗ്യമന്ത്രിയുടെ ഓഫീസിന് മുന്നിൽ സ്ഥാപിച്ച ബോർഡ് ഭരണ സംവിധാനത്തിന്റെ പരാജയം ജനങ്ങൾക്ക് മുന്നിൽ തുറന്നുകാട്ടുന്ന ശക്തമായ സന്ദേശമാണെന്ന് നഹാസ് പത്തനംതിട്ട പറഞ്ഞു. പിഴവുകൾ മറച്ചുവെക്കുന്നതിനുപകരം സുതാര്യമായ അന്വേഷണം നടത്തുകയും ഉത്തരവാദികളായവർക്കെതിരെ കർശന നടപടികൾ സ്വീകരിക്കുകയും വേണമെന്ന് അദ്ദേഹം ആവശ്യപ്പെട്ടു. ജനാരോഗ്യം സർക്കാർ പരീക്ഷണശാലയല്ലെന്നും ആരോഗ്യ മേഖലയിലെ അനാസ്ഥ അവസാനിപ്പിക്കുന്നതുവരെ യൂത്ത് കോൺഗ്രസിന്റെ പ്രതിഷേധങ്ങൾ ശക്തമായി തുടരുമെന്നും നേതാക്കള് പറഞ്ഞു. മനു തയ്യിൽ, നജീം രാജൻ, ആരിഫ് എം.സി, സുഹൈൽ നജീബ്, അജ്മൽ അലി, ഷെഫിൻ ഷാനവാസ്, റെജബ് അയ്യൂബ് എന്നിവർ സമരത്തിന് നേതൃത്വം നൽകി.
