ബംഗളൂരു : നഗ്നചിത്രങ്ങള് സാമൂഹികമാധ്യമങ്ങളിലൂടെ പ്രചരിപ്പിച്ച ഡോക്ടറെ മര്ദിച്ചുകൊന്ന കേസിലെ പ്രതികളെ പോലീസ് അറസ്റ്റ് ചെയ്തു. പ്രതിഭ (24), പ്രതിഭയുടെ കൂട്ടുകാരായ ഗൗതം (24), സുശീല് (27), സൂര്യ (25) എന്നിവരാണ് അറസ്റ്റിലായത്. ബെംഗളൂരു ന്യൂ മൈക്കോ ലേഔട്ടിലാണ് സംഭവം. തമിഴ്നാട് സ്വദേശി എന്. വികാസാണ് (27) കൊല്ലപ്പെട്ടത്.
യുക്രൈനില് പഠനം പൂര്ത്തിയാക്കിയ വികാസ് ഒരുവര്ഷം മുമ്പാണ് മെഡിക്കല് കൗണ്സിലിന്റെ സ്ക്രീനിങ് പരീക്ഷാപരിശീലനത്തിനായി ബംഗളൂരുവിലെത്തിയത്. ഇതിനിടെ പ്രതിഭയെ പരിചയപ്പെടുകയും തുടര്ന്ന് ബി.ടി.എം. ലേഔട്ടില് ഇവര്വീട് വാടകയ്ക്കെടുത്ത് ഇരുവരും താമസിച്ച് പോരുകയായിരുന്നു.
ഈ മാസം എട്ടിനാണ് പ്രതിഭ തന്റെ നഗ്നചിത്രങ്ങള് സാമൂഹികമാധ്യമത്തില് പ്രചരിക്കുന്നത് കണ്ടത്. സംശയം തോന്നിയ ഇവര് വികാസിന്റെ കംപ്യൂട്ടര് പരിശോധിച്ചതോടെ ഇയാളാണ് മറ്റൊരുപേരില് ചിത്രങ്ങള് പ്രചരിപ്പിക്കുന്നതെന്ന് വ്യക്തമാകുകയായിരുന്നു. ഇതോടെ യുവതി സൃഹൃത്തുക്കളെ വിവരമറിയിക്കുകയും പിന്നീട് സുശീലിന്റെ വീട്ടിലേക്ക് വിളിച്ചുവരുത്തിയ വികാസിനെ നാലുപേരും ചേര്ന്ന് ചോദ്യംചെയ്യുകയും ഇരുമ്പുവടി, വെള്ളക്കുപ്പി എന്നിവകൊണ്ട് മര്ദിക്കുകയുമായിരുന്നു.
