തിരുവനന്തപുരം : കേരളത്തിന്റെ മുഖ്യമന്ത്രിയെ സംബന്ധിച്ചുള്ള കോൺഗ്രസ് ഹൈക്കമാൻഡ് ചർച്ചകൾ നിർണായക ഘട്ടത്തിലേക്ക് കടക്കുന്നതിനിടെ സംസ്ഥാനത്തിന്റെ ചുമതലയുള്ള എ.ഐ.സി.സി ജനറൽ സെക്രട്ടറി ദീപാ ദാസ് മുൻഷി അടിയന്തരമായി കേരളത്തിലെത്തുന്നു. ഡൽഹിയിൽ നിന്ന് വൈകിട്ട് 3:15-നുള്ള എയർ ഇന്ത്യ വിമാനത്തിൽ പുറപ്പെട്ട അവർ 6:30-ഓടെ തിരുവനന്തപുരത്ത് എത്തും. കെ.പി.സി.സി വർക്കിംഗ് പ്രസിഡന്റുമാരായ എ.പി. അനിൽകുമാർ, ഷാഫി പറമ്പിൽ, പി.സി. വിഷ്ണുനാഥ് എന്നിവരും ദീപാ ദാസ് മുൻഷിക്കൊപ്പം അതേ വിമാനത്തിൽ കേരളത്തിൽ എത്തും .
സുപ്രധാന തീരുമാനം ഹൈക്കമാൻഡ് കൈക്കൊള്ളുന്ന സാഹചര്യത്തിൽ കേരളത്തിലെ നേതാക്കൾക്കിടയിൽ ഉണ്ടായേക്കാവുന്ന അതൃപ്തിയോ പൊട്ടിത്തെറിയോ ഒഴിവാക്കാനാണ് ദീപാ ദാസ് മുൻഷിയെ ഹൈക്കമാൻഡ് നേരിട്ട് അയക്കുന്നതെന്നാണ് ലഭിക്കുന്ന സൂചന. തീരുമാനം പ്രഖ്യാപിച്ച ശേഷം നേതാക്കളെ അനുനയിപ്പിക്കാനും ഏകോപിപ്പിക്കാനുമുള്ള ദൗത്യമാണ് ദീപാ ദാസ് മുൻഷിക്ക് നൽകിയിരിക്കുന്നത്.
