തിരുവനന്തപുരം : നിയന്ത്രണങ്ങള് ഏര്പ്പെടുത്തുമ്പോള് നിയമം നടപ്പാക്കേണ്ടത് മാന്യമായ രീതിയില് ആയിരിക്കണമെന്ന് സംസ്ഥാന പോലീസ് മേധാവി അനില് കാന്ത് ജില്ലാ പോലീസ് മേധാവിമാര്ക്ക് നിര്ദ്ദേശം നല്കി. സബ് ഡിവിഷണല് പോലീസ് ഓഫീസര്മാര് ഇക്കാര്യം പ്രത്യേകം നിരീക്ഷിക്കുമെന്നും അദ്ദേഹം പറഞ്ഞു.
കോവിഡ്, ട്രാഫിക്ക് ഡ്യൂട്ടികള് നടപ്പിലാക്കുന്ന പോലീസ് ഉദ്യോഗസ്ഥര് പലപ്പോഴും വളരെ ബുദ്ധിമുട്ടേറിയ സാഹചര്യത്തിലാണ് ജോലി നോക്കേണ്ടി വരുന്നത്. എന്നാല് നിയന്ത്രണങ്ങള് നടപ്പിലാക്കുമ്പോള് പോലീസ് ഉദ്യോഗസ്ഥര് അതിരുവിട്ടു പെരുമാറാന് പാടില്ലെന്ന് സംസ്ഥാന പോലീസ് മേധാവി ഓര്മ്മിപ്പിച്ചു. കോവിഡ്, ട്രാഫിക്ക് നിയന്ത്രണങ്ങളുടെ ചുമതല വഹിക്കുന്ന പോലീസ് ഉദ്യോഗസ്ഥരുടെ പെരുമാറ്റം അതിരുകടക്കുന്നതായ റിപ്പോര്ട്ടുകളുടെ അടിസ്ഥാനത്തിലാണ് നിര്ദ്ദേശം.
