കൊച്ചി : നടിയെ തട്ടിക്കൊണ്ടുപോയി പീഡിപ്പിച്ച കേസില് കുറ്റപത്രം ഉടന് നല്കേണ്ടതില്ലെന്ന് അന്വേഷണ സംഘത്തിന് നിര്ദേശം. കേസ് അന്വേഷണത്തിനായി കോടതിയോട് കൂടുതല് സമയം ആവശ്യപ്പെടും. കേസ് അട്ടിമറിക്കാന് നീക്കം നടക്കുന്നുണ്ടെന്ന അതിജീവിതയുടെ ആരോപണത്തിന്റെ കൂടി പശ്ചാത്തലത്തിലാണ് നിര്ദേശമെന്നാണ് സൂചന. കേസില് തെളിവുകള് പൂര്ണമായി ശേഖരിച്ച് അതിന് ശേഷം മാത്രം കുറ്റപത്രം നല്കിയാല് മതിയെന്ന തീരുമാനത്തിലാണ് അന്വേഷണ സംഘം.
നടി ആക്രമിക്കപ്പെട്ട കേസ് അട്ടിമറിക്കുന്നുവെന്ന് ആരോപിച്ച് അതിജീവിത നല്കിയ ഹര്ജി കോടതി ഇന്ന് പരിഗണിക്കും. സര്ക്കാരിന്റേയും അന്വേഷണ സംഘത്തിന്റേയും നിലപാട് കോടതി തേടിയേക്കും. ജസ്റ്റിസ് സിയാദ് റഹ്മാന് അധ്യക്ഷനായ ബെഞ്ചാണ് ഹര്ജി പരിഗണിക്കുന്നത്. കേസിലെ പ്രതിയായ ദിലീപ് ഉന്നത രാഷ്ട്രീയ സ്വാധീനമുള്ള വ്യക്തിയാണ്. കേസിന്റെ അന്വേഷണം അവസാനിപ്പിക്കാന് അന്വേഷണസംഘത്തിന് മേല് രാഷ്ട്രീയ സമ്മര്ദ്ദമുണ്ട്. അന്തിമ റിപ്പോര്ട്ട് തട്ടിക്കൂട്ടി നല്കാനും ശ്രമിക്കുന്നു. ദിലീപിന്റെ അഭിഭാഷകര് കേസിലെ സാക്ഷികളെ സ്വാധീനിക്കാന് ശ്രമിച്ചതിന് തെളിവുകള് പുറത്തുവന്നിട്ടും എന്തുകൊണ്ടാണ് അന്വേഷണത്തില് നിന്ന് അവരെ ഒഴിവാക്കിയത് എന്ന് നടി പരാതിയിലൂടെ ചൂണ്ടിക്കാട്ടി. ഈ സാഹചര്യത്തിലാണ് കോടതി ഇടപെടണമെന്ന് നടി ആവശ്യപ്പെട്ടിരിക്കുന്നത്.
കസ്റ്റഡിയിലുള്ള ദൃശ്യം ചോര്ന്ന സംഭവത്തില് വിചാരണ കോടതി ജഡ്ജിക്കെതിരെ അന്വേഷണം വേണമെന്നും ആവശ്യം ഉന്നയിച്ചിട്ടുണ്ട്. വിചാരണ കോടതി ജഡ്ജിയുടേത് കുറ്റവാളികളെ രക്ഷിക്കാനുള്ള താത്പര്യമാണ് സംശയിക്കുന്നതായും നടി ഹര്ജിയില് ആരോപിക്കുന്നു. കേസ് തിടുക്കത്തില് അവസാനിപ്പിക്കാന് നീക്കം നടക്കുന്നതായി വിവരം ലഭിച്ചെന്നും ഇത് നീതി നിഷേധത്തിന് ഇടയാക്കുമോ എന്ന ആശങ്ക ഉണ്ടാക്കുന്നുണ്ടെന്നും നടിയുടെ ഹര്ജിയിലുണ്ട്. ദിലീപിന്റെ അഭിഭാഷകരെ ചോദ്യം ചെയ്യാനുള്ള ശ്രമം തടുത്തത് രാഷ്ട്രീയ ബന്ധമാണെന്നും ഹര്ജിയില് പറയുന്നു.
