കൊച്ചി : നടിയെ പീഡിപ്പിച്ച കേസ് അന്വേഷിച്ച ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയ കേസില് നടന് ദിലീപ് അടക്കമുള്ള അഞ്ചു പ്രതികളുടെ ഇന്നത്തെ ചോദ്യം ചെയ്യല് 8മണിയോടെ അവസാനിച്ചു. പതിനൊന്നു മണിക്കൂറോളമാണ് ദിലീപിനെ ക്രൈം ബ്രാഞ്ച് ചോദ്യം ചെയ്തത്. പ്രതികള് ഇന്നു മുതല് ചൊവ്വാഴ്ച വരെ ചോദ്യം ചെയ്യലിനു ഹാജരാകണo. ഹൈക്കോടതി ഉത്തരവ് അനുസരിച്ചാണ് നടപടി.
പ്രതികള് രാവിലെ 9 മുതല് വൈകീട്ട് 8 വരെ അന്വേഷണ ഉദ്യോഗസ്ഥര്ക്കു മുന്നിലുണ്ടാകണമെന്ന് ജസ്റ്റിസ് പി.ഗോപിനാഥ് നിര്ദേശിച്ചിരുന്നു. ദിലീപ്, സഹോദരന് അനൂപ്, സഹോദരീഭര്ത്താവ് ടി.എന്.സുരാജ്, ഡ്രൈവര് അപ്പു, സുഹൃത്ത് ബൈജു ചെങ്ങമനാട് എന്നിവര് നല്കിയ മുന്കൂര് ജാമ്യാപേക്ഷയിലാണു ഹൈക്കോടതി ഇടക്കാല ഉത്തരവ് പുറപ്പെടുവിച്ചത്. ചോദ്യം ചെയ്യലിലൂടെ ലഭിക്കുന്ന വിവരങ്ങളും മറ്റു തെളിവുകളും അടക്കമുള്ള റിപ്പോര്ട്ട് വ്യാഴാഴ്ച രാവിലെ മുദ്രവെച്ച കവറില് നല്കണമെന്നും ഹൈക്കോടതി ആവശ്യപ്പെട്ടിട്ടുണ്ട്. വ്യാഴാഴ്ച വരെ പ്രതികളെ അറസ്റ്റ് ചെയ്യരുതെന്നും കോടതി ഉത്തരവുണ്ട് . കേസ് വ്യാഴാഴ്ച വീണ്ടും പരിഗണിക്കും.