തിരുവനന്തപുരം : എൽഡിഎഫിലും യുഡിഎഫിലും അല്ലാതെ മറ്റൊരു മുന്നണിയിലേക്ക് മാറാൻ സാധ്യതയുണ്ടെങ്കിൽ അത് ഉപയോഗിക്കണമെന്ന ആവശ്യം കേരള കോൺഗ്രസ് എം സ്റ്റിയറിംഗ് കമ്മിറ്റിയിൽ ശക്തമാകുന്നു. ബിജെപി നേതൃത്വം നൽകുന്ന എൻഡിഎ മുന്നണിയിലേക്ക് പോകണമെന്ന നിർദ്ദേശമാണ് പാർട്ടിയിലെ ഒരു വിഭാഗം നേതാക്കൾ മുന്നോട്ടുവെച്ചിരിക്കുന്നത്. എൻഡിഎയിലേക്ക് പോകണമെന്ന അഭിപ്രായം ആദ്യമായി ഉയർന്നത് കൊല്ലം ജില്ലാ കമ്മിറ്റിയിൽ നിന്നാണ്. ബിജെപിയാണോ ഉദ്ദേശിക്കുന്നത് എന്ന ചെയർമാൻ ജോസ് കെ. മാണിയുടെ ചോദ്യത്തിന് ‘അതെ’ എന്ന കൃത്യമായ മറുപടിയാണ് ജില്ലാ അധ്യക്ഷൻ നൽകിയത്.
കൊല്ലത്തിന് പിന്നാലെ മലബാർ മേഖലയിൽ നിന്നുള്ള നേതാക്കളും സമാനമായ അഭിപ്രായം രേഖപ്പെടുത്തി. അർഹമായ പദവികൾ ലഭിക്കുകയാണെങ്കിൽ മുന്നണി മാറുന്നതിൽ തെറ്റില്ലെന്നാണ് ഇവരുടെ നിലപാട്. പാർട്ടി ചെയർമാന് കേന്ദ്ര മന്ത്രിസ്ഥാനവും ഒപ്പം ഒരു ഗവർണർ പദവിയും ലഭിക്കുകയാണെങ്കിൽ എൻഡിഎയുമായി സഹകരിക്കാമെന്ന നിർദ്ദേശമാണ് മലബാറിൽ നിന്നുള്ള പ്രതിനിധികൾ മുന്നോട്ട് വെച്ചത്. നിലവിൽ എൽഡിഎഫ് വിടണമെന്നും ഒറ്റയ്ക്ക് നിന്ന് പാർട്ടിയുടെ കരുത്ത് തെളിയിക്കണമെന്നുമുള്ള അഭിപ്രായവും യോഗത്തിൽ ഉയർന്നു വന്നിട്ടുണ്ട്.
