റാന്നി: ഇന്ധനക്ഷാമം രൂക്ഷമായതുമൂലം കെ.എസ്.ആര്.ടി.സി സര്വ്വീസുകള് മുടങ്ങുന്നു. ദീര്ഘദൂര സര്വ്വീസുകള് പലതും പൂര്ത്തിയാക്കുന്നത് പല ഡിപ്പോകളിലെത്തി ഡീസല് അടിച്ചാണ്. ഇതും ടാങ്ക് നിറയെ കിട്ടാറുമില്ല. വരുമാനമുള്ള സര്വ്വീസുകള് കുറച്ചു ദിവസമായി ഓടുന്നത് വരുമാനം കുറഞ്ഞ ബസുകളുടെ ഡീസല് ശേഖരിച്ചാണ്. കഴിഞ്ഞദിവസം റാന്നിയില് നിന്നും കുടിയാന്മലയ്ക്കു പോയ സൂപ്പര് ഫാസ്റ്റ് ബസ് റാന്നി ഡിപ്പോയില് കിടന്ന ബസിലെ ഡീസല് ഊറ്റിയാണ് സര്വ്വീസിനു പോയത്.
അരമണിക്കൂറോളം വൈകി പോയ ബസ് പാലായിലും പെരുമ്പാവൂരിലും എത്തി ഡീസല് നിറച്ചു. ഇവിടെ നിന്നും പൂര്ണ്ണമായും ഡീസല് കിട്ടിയില്ല. റേഷന് സബ്രദായത്തിലാണ് ഡീസല് കിട്ടുന്നത്. ഓട്ടത്തിനിടയില് ഡിപ്പോകളില് ഡീസല് നിറയ്ക്കാന് കയറുന്നത് സമയ നഷ്ടത്തിനിടയാക്കും. വലിയ ലാഭത്തില് ഓടുന്ന ബസുകള് സമയകൃത്യത പാലിക്കാതെ സര്വ്വീസ് നടത്തുന്നത് കളക്ഷനെ ബാധിക്കുവാനും സാധ്യതയേറെയാണ്.
ബസ് വഴിയില് ആകാതിരിക്കാന് ചില സര്വ്വീസുകള് സ്വകാര്യ പമ്പുകളില് നിന്നും ഇന്ധനം നിറയ്ക്കുന്നുണ്ട്. ഇത് കെ.എസ്.ആര്.ടി.സിക്ക് വലിയ സാമ്പത്തിക പ്രതിസന്ധി വരുത്തി വെക്കാനും ഇടയാക്കുന്നുണ്ട്. സ്ഥിരം യാത്രക്കാര് പലരും ബസുകള് നോക്കി നില്ക്കാന് തയ്യാറാകാതെ കിട്ടുന്ന ബസുകളില് കയറി പോകുന്ന സാഹചര്യവും ഉണ്ട്. ഇത് മികച്ച വരുമാനമുള്ള സര്വ്വീസുകളെ പ്രതിസന്ധിക്കിടയാക്കിയിട്ടുണ്ട്.
